/2023.02.07/: Даваа гарагт Турк, Сирид болсон газар хөдлөлтийн улмаас олон мянган байшин барилга нурсан байж болзошгүй гэж НҮБ-ын Хүүхдийн сангаас мэдээллээ.

"Температур нь хасах хэмийг зааж, цас, бороо их орж байна. Сүүлийн өдрүүдэд Сири, Туркийн зарим хэсэгт хүчтэй цасан шуурга шуурсан. Цаашид цаг агаар тэгээс доош хэмтэй байх төлөвтэй байна" гэж НҮБ-ын Хүүхдийн сангийн мэдэгдэлд дурджээ.

Даваа гарагийн үүрээр Турк, Сирид болсон 7.8 магнитудын хүчтэй газар хөдлөлтийн улмаас одоогийн байдлаар 3,830 хүн амиа алдсан нь батлагдаад байна. Зөвхөн Турк улсад л гэхэд 5606 барилга нурсан гэж Туркийн Гамшиг, онцгой байдлын албаныхан мэдээлэв. Сирийн хойд хэсэгт ч мөн адил хэмжээний сүйрэл болсон тухай мэдэгдэж байгаа аж.

НҮБ-ын Хүүхдийн сан нь Туркийн Засгийн газар болон Туркийн Гамшиг, онцгой байдлын удирдлагатай хамгийн өргөн хүрээтэй хүмүүнлэгийн хариу арга хэмжээ авахаар ажиллаж байгаа гэж мэдэгджээ.

Эх сурвалж: CNN