/2022.10.25/: Риши Сунак дараагийн Ерөнхий сайд болохын төлөөх өрсөлдөөнд ялалт байгуулсныхаа дараа "эдийн засгийн гүнзгий сорилт"-ын өмнө эв нэгдэлтэй байхыг уриаллаа.
Түүний өрсөлдөгч болох Пенни Мордаунт нь УИХ-ын гишүүдээс хангалттай дэмжлэг авч чадаагүй тул тэрээр Торигийн манлайллын тэмцээнд түрүүлсэн.
Ноён Сунак Ерөнхий сайд болсны дараа хэлсэн эхний үгэндээ намаа болон Их Британийг нэгтгэх нь түүний "хамгийн тэргүүн зорилт" болно гэж хэлжээ.
Ноён Сунак Их Британийн Ази гаралтай анхны Ерөнхий сайд бөгөөд сүүлийн 200 гаруй жилийн хугацаан дахь хамгийн залуу Ерөнхий сайд болж байна.
42 настай хинду шашинтай Сунак нь албан ёсоор томилогдсоны дараа мягмар гарагт албан тушаалдаа орох төлөвтэй байна.
Хожим нь хоёр минут хүрэхгүй үргэлжилсэн телевизээр хэлсэн үгэндээ ноён Сунак "үнэнч шударгаар" үйлчлэхээ амлаж, "онцгой хүнд нөхцөлд" улс орноо удирдаж байгаад бүрэн эрхээсээ чөлөөлөгдөж буй Ерөнхий сайд Лиз Трусст талархал илэрхийлэв.
"Их Британи бол агуу орон боловч бид эдийн засгийн гүн сорилттой тулгарч байгаа нь эргэлзээгүй" гэв. Бидэнд одоо тогтвортой байдал, эв нэгдэл хэрэгтэй байгаа тул намаа, улс орноо нэгтгэхийг би нэн тэргүүний зорилт болгох болно.
Ноён Сунакийн гол өрсөлдөгч болох Пенни Мордаунт сонгуулийн дүнг зарлахаас хэдхэн минутын өмнө нэрээ татсан байна.
Тэрээр "Энэ шийдвэр бол түүхэн шийдвэр бөгөөд манай намын олон талт байдал, авъяас чадварыг дахин харуулж байна" гэв.
Хатагтай Мордаунт Ерөнхий сайдын суудалд өрсөлдсөн ч Ерөнхий сайд асан Борис Жонсон ням гарагт нэрээ татсаны дараа ноён Сунакийн талд нэгдэхээс өөр аргагүй байдалд оржээ.
Ердөө долоохон долоо хоногийн өмнө Ерөнхий сайдын албан тушаалаасаа огцорсон ноён Борис Жонсон Ерөнхий сайдын суудлын төлөө зогсох хангалттай дэмжлэгтэй гэж мэдэгдсэн ч одоо "зөв цаг нь биш" гэдгийг хүлээн зөвшөөрч нэрээ татсан юм.
Эх сурвалж: ВВС
