/2022.10.21/: Нью-Йоркийн шүүх жүжигчин Кевин Спэйсигийн эсрэг бэлгийн хүчирхийллийн хэргийг хэрэгсэхгүй болгожээ.
Хэргийг Энтони Рапп гаргасан бөгөөд жүжигчин Кевин Спэйси 1986 онд түүнийг 14 настай байхад нь үдэшлэг дээр зохисгүй байдлаар өөрт нь гар хүрсэн гэж мэдэгджээ.
Оскарын шагналт ноён Спэйси өөрийг нь буруутгаж буйг няцаасан юм.
Түүнийг Их Британид бэлгийн хүчирхийллийн хэргээр тус тусад нь таван хэрэгт буруутгаж байгаа бөгөөд тэрээр өөрийгөө гэм буруугүй гэж мэдэгджээ. Энэ шүүх хурал 2023 оны зургаадугаар сард эхлэх аж.
Манхэттений холбооны шүүхэд гурван долоо хоног үргэлжилсэн иргэний хэргийн шүүх хурлын дараа тангарагтны шүүх Раппыг бэлгийн хүчирхийлэл үйлдсэн гэсэн мэдэгдлийг нотлох баримтгүй гэж тогтоожээ.
2017 оны аравдугаар сард Buzzfeed-ийн нийтлэлд ноён Рапп ноён Спэйси түүнийг өргөж, орон дээр хэвтүүлсэн гэж хэлсэн юм. "Тэр надтай бэлгийн харьцаанд орохыг оролдож байгааг би мэдэж байсан" гэж тэр бичжээ.
Шүүх хурлынхаа гурав дахь долоо хоногт өөрийгөө өмгөөлж буй ноён Спэйси хэлэхдээ, ноён Рапп таван жилийн өмнө энэхүү хэргийг олон нийтэд дэлгэхэд би маш их цочирдсон гэжээ.
Спэйси өөрийгөө тухайн үед үнэхээр тийм зүйл болсон эсэхийг санахгүй байгаа талаар дурдсан бөгөөд Раппын өмгөөлөгч Ричард Стайгман ноён Спэйсигийн ой санамжид нь өөрчлөлт орсон гэж үзэж байгаа аж.
Ноён Спэйсигийн өмгөөлөгч Женнифер Келлер ноён Раппын түүхийг зохиомол зүйл гэж бодож байгаагаа хэлжээ.
Эх сурвалж: ВВС
