/2022.10.17/: Нигерт сүүлийн 10 жилд тохиолдсон хамгийн хүчтэй үерийн улмаас амиа алдагсдын тоо 600-г давлаа гэж тус улсын Хүмүүнлэгийн яам ням гарагт твиттер хуудсандаа бичжээ.
Тус яамны мэдээлснээр, ялангуяа борооны улирлын дараа тус улсын өмнөд хэсгээр тархсан үерт 2 сая гаруй хүн нэрвэгдсэн байна.
200,000 гаруй байшин бүрэн болон хэсэгчлэн эвдэрсэн гэж тус яам нэмж хэлэв.
Энэ сарын эхээр Нигерийн Үндэсний Онцгой байдлын агентлаг Нигер болон Бенуэ голын дагуу орших мужуудад гамшигт үер болох талаар анхааруулж, Нигерийн гурван усан сан үерлэх төлөвтэй байгааг мэдэгдэж байжээ. ОБЕГ-аас хөрш Камеруны далангаас илүүдэл ус асгарсан нь үерт нөлөөлсөн гэж мэдэгдэв.
Нигерийн олон бүс нутаг жил бүр үерт өртөмтгий байдаг ч зарим бүс нутагт 2012 оны сүүлчийн томоохон үерээс илүү хүчтэй байсан гэж Коги дахь Улаан загалмайн албаны хүн өнгөрсөн долоо хоногт CNN-д ярьжээ.
Нигерийн Хүмүүнлэгийн асуудал эрхэлсэн сайд Садия Умар Фарук ням гарагт дахин үер болж болзошгүйг анхааруулж, бүс нутгийн засгийн газруудад бэлтгэлээ хангахыг уриалав.
“Бид үерийн аманд амьдарч буй иргэдийг өндөр газарт нүүлгэн шилжүүлэх, майхан, тусламжийн материал, цэвэр ус, эмнэлгийн хэрэгслээр хангах замаар илүү их үерийн гамшигт бэлтгэхийг холбогдох муж улсын засаг захиргаа, нутгийн захиргааны зөвлөл, нөхөрлөлүүдийг уриалж байна" гэж Хүмүүнлэгийн яамны ням гарагт твиттер хуудсандаа мэдэгдэв.
Тус улс үерийн гамшгаас хамгаалах үйл ажиллагааны уялдаа холбоог сайжруулахад чиглэсэн Үерийн гамшгийн үеийн бэлэн байдал, хариу арга хэмжээний үндэсний төлөвлөгөөг удахгүй хэрэгжүүлэх болно.
Тус яамны мэдээлснээр, "холбооны бүх мужид тусламж үзүүлсэн" бөгөөд "олон муж улсын засгийн газар үерийн гамшигт урьдчилан бэлтгээгүй байсан" гэжээ.
Эх сурвалж: CNN
