/2022.09.12/: Манай улсад сэтгэцэд нөлөөлөх эм, бэлдмэл болон мансууруулах төрлийн үйлчилгээтэй өвс, ургамал түүх гэмт хэрэгт залуучууд оролцох явдал нэмэгдэж байна.
Жишээ нь өчигдөр 16:20 цагийн үед Сэлэнгэ аймгийн Мандал сумын нутаг дэвсгэрт "Сэлэнгэ-Улаанбаатар" чиглэлийн суудлын галт тэрэгний вагонд "Мансууруулах өвс биедээ авч явж байгаа 2 хүн байна" гэсэн дуудлага төмөр зам дахь цагдаагийн хэлтэст иржээ.
Мэдээллийн дагуу шалгалтын ажиллагааг явуулахад Баянгол дүүрэгт оршин суух хаягтай 17 настай, эрэгтэй "Т", 20 настай, эрэгтэй "Э" нар нь одоогоор нэр тодорхойгүй 5 боодол бүхий ногоон өнгийн навчит ургамал биедээ авч явсныг илрүүлэн Төмөр зам дахь цагдаагийн газраас шалгалтын ажиллагааг явуулж байгаа аж.
Иймд энэ төрлийн гэмт хэрэгт өртөхгүй байх, хууль бус ургамал түүж бэлдэхгүй байхыг Цагдаагийн байгууллагаас анхааруулж байна.
Эх сурвалж: ЦЕГ
