/2022.08.17/ Монгол Улсын Их Хурлын ээлжит бус чуулганыг 2022 оны наймдугаар сарын 22-ноос 26-ны өдрүүдэд товлон зарлах тухай захирамж гаргажээ.
Тодруулбал, Монгол Улсын Их Хурлын дарга Г.Занданшатар өнөөдөр буюу энэ сарын 17-нд Монгол Улсын Үндсэн хуулийн Хорин долдугаар зүйлийн 3 дахь хэсэг, Монгол Улсын Их Хурлын тухай хуулийн 14 дүгээр зүйлийн 14.1.2, 19 дүгээр зүйлийн 19.1, 19.4, 19.5 дахь хэсгийг тус тус үндэслэн ийнхүү ээлжит бус чуулган зарласан байна.
Чуулганаар,
- Үндэсний аюулгүй байдлын зөвлөлийн мэдээлэл;
- Монгол Улсын Үндсэн хуулийн цэцийн 2022 оны 02 дугаар тогтоолтой холбоотой асуудал;
- Цаг үеийн асуудлаарх мэдээлэл сонсох зэргийг хэлэлцэх ажээ.
Ээлжит бус чуулганы нэгдсэн хуралдаан энэ сарын 22-ны өдрийн Даваа гарагийн 10.00 цагт эхэлнэ.
Эх сурвалж: Улсын Их Хурлын Хэвлэл мэдээлэл, олон нийттэй харилцах хэлтэс
