Дэлхийн зах зээл шинэ долоо хоногийг харьцангуй өөдрөг эхлүүлсэн ч инфляц, эрчим хүч, өндөр бондын өгөөж болон AI-ийн хөрөнгө оруулалтын эрсдэл зэрэгцэн оршсоор байна.

01 | АНУ- МӨНГӨНИЙ БОДЛОГО

Холбооны нөөцийн сан аравдугаар сарын хүү нэмэх хүлээлт огцом буурав

АНУ-ын есдүгээр сарын ажил эрхлэлтийн өсөлт хүлээлтээс сул гарсны дараа Холбооны нөөцийн сан энэ сард дахин хүү өсгөх магадлал 64%-аас 22% болж буурлаа.

АНУ-ын 10 жилийн Treasury-ийн өгөөж даваа гарагт 5.26% орчимд буурсан ч 24 жилийн дээд түвшний ойролцоо хэвээр байна.

Том зураг: Хөдөлмөрийн зах зээл суларч байгаа нь хүүгийн дарамтыг багасгаж болох ч өндөр эрчим хүчний үнэ инфляцын эрсдэлийг хадгалж байна.

02 | ЭРЧИМ ХҮЧ - ГАЗРЫН ТОС

Газрын тос $100-аас дээш хэвээр, нийлүүлэлтийн эрсдэл нэмэгдэв

Brent нефтийн үнэ $102.20/баррель орчимд хадгалагдаж байна.

Ойрх Дорнодын нефтийн экспорт дайны өмнөх түвшнээс давсан ч Хормузын хоолойгоор зорчиж буй танкеруудад халдах тохиолдол нэмэгдсэн байна. Есдүгээр сарын сүүлээр бүс нутгийн түүхий нефтийн экспорт зарим өдөр 22.5 сая баррель/өдөрт хүрчээ.

Том зураг: Нийлүүлэлт хэвийн байгаа мэт боловч тээврийн эрсдэл нэмэгдсэн нь нефтийн үнийг өндөр түвшинд барьж байна.

03 | ЕВРОП- ИНФЛЯЦ

Евро бүсийн инфляц 3.8%-д хүрч, ECB-д дарамт нэмэгдэв

Евро бүсийн инфляц есдүгээр сард 3.8% болж, наймдугаар сарын 3.2%-оос огцом өсөв. Гол шалтгаан нь шатахуун, байгалийн хий болон хүнсний үнийн өсөлт байлаа.

Суурь инфляц мөн 2.4%-өөс 2.5% болж нэмэгдсэн нь Европын Төв банкинд хүүгийн бодлогоо дахин чангатгах дарамт үүсгэж байна.

Том зураг: Эрчим хүчний үнийн өсөлт Европын эдийн засагт инфляц болон төсвийн дарамтыг зэрэг нэмэгдүүлж байна.

04 | AI -ХӨРӨНГӨ ОРУУЛАЛТ

AI-ийн дэд бүтцэд зарцуулах хөрөнгө $30 их наяд хүрч болзошгүй

PwC-ийн тооцоогоор дэлхийн дата төвүүдэд хийх хуримтлагдсан хөрөнгө оруулалт 2050 он гэхэд $30 их наяд давж болзошгүй байна.

Үүний зэрэгцээ Anthropic ойрын жилүүдэд $518 тэрбум зарцуулахаар төлөвлөж байгаа бөгөөд Google, Amazon, Microsoft зэрэг томоохон компаниуд AI дэд бүтцийн хөрөнгө оруулалтаа нөхөхийн тулд ойрын таван жилд $4.2 их наядын шинэ орлого бий болгох шаардлагатай гэж Bain тооцжээ.

Том зураг: AI-ийн хөрөнгө оруулалт түүхэн хэмжээнд хүрч байгаа ч гол асуулт нь энэ их хөрөнгө оруулалт хэзээ бодит бүтээмж, орлого болж хувирах вэ гэдэгт байна.

ТОМ ЗУРГААР ХАРВАЛ...

Өнөөдрийн дөрвөн мэдээг холбож харвал дэлхийн эдийн засаг хоёр өөр хүчний дунд байна.

Нэг талд, өндөр нефтийн үнэ, инфляц, бондын өгөөж төв банкуудын бодлогыг хязгаарлаж байна.

Нөгөө талд, AI-ийн асар том хөрөнгө оруулалтын мөчлөг дата төв, чип, эрчим хүч, санхүүжилтийн эрэлтийг улам нэмэгдүүлж байна.

АНУ-д хүүгийн өсөлтийн хүлээлт буурч байгаа ч Европт инфляц дахин хурдассан. Харин AI-ийн салбарт хөрөнгө оруулалтын хэмжээ улам тэлсээр байна.

Өөрөөр хэлбэл, 2026 оны дэлхийн эдийн засгийн гол асуулт зөвхөн хүү хэд болох биш. Өндөр инфляц ба асар их технологийн хөрөнгө оруулалт нэгэн зэрэг хэр удаан үргэлжлэх гэдэг асуудал болж байна.

mpress.mn- Дэлхийг том зургаар.

Эх сурвалж: Reuters, PwC, Eurostat, Bain & Company.