“Амгалан дулааны станц” ТӨХК-ийн хүчин чадлыг 116МВт-аар нэмэгдүүллээ
 

“Амгалан дулааны станц” ТӨХК-ийн хүчин чадлыг 116МВт-аар нэмэгдүүллээ

/2024.04.19/: “Амгалан дулааны станц” ТӨХК-ийн өргөтгөлийг хүлээн авах ёслолын ажиллагаа боллоо.

Ёслолын нээлтийн ажиллагаанд Монгол Улсын Ерөнхий сайд Л.Оюун-Эрдэнэ, УИХ-ын гишүүн, Засгийн газрын гишүүн, Эрчим хүчний сайд Б.Чойжилсүрэн, дэд сайд М.Баярмагнай болон бусад хүндэт зочид оролцсон юм.

Монгол Улсын Засгийн газраас хэрэгжүүлж буй “Шинэ сэргэлтийн бодлого” түүний дотор Эрчим хүчний сэргэлтийн зорилтод “Амгалан дулааны станц” ТӨХК-ийн суурилагдсан хүчин чадлыг 116 МВт-ын хүчин чадалтай нэг зуухаар өргөтгөх төсөл багтаж байсан юм. Тус станц өөрийн болон Монгол Улсын Хөгжлийн банкны нийт 65.6 тэрбум төгрөгийн зээлийн санхүүжилтээр хэрэгжсэн уг төслийн барилга угсралтын ажлыг 2022 оны зургаадугаар сард эхлүүлсэн бөгөөд төлөвлөсөн хугацаанаас дөрвөн сарын өмнө ашиглалтад оруулж буйгаараа онцлогтой.

Төслийн ерөнхий гүйцэтгэгчээр БНХАУ-ын “Хунан индустриал экүйпмент инсталэйшн” ХХК шалгаран ажилласан. Уг компани Монгол Улсын эрчим хүчний салбарт Дулааны гуравдугаар цахилгаан станцын 50 МВт-ын өргөтгөл, Эрдэнэтийн дулааны цахилгаан станцын 35 МВт-ын өргөтгөлийн төслүүдийг амжилттай хэрэгжүүлсэн туршлагатай.

Энэхүү бүтээн байгуулалт нь байгаль орчинд сөрөг нөлөөлөл багатай дэвшилтэт технологийг шингээсэн. Улаанбаатар хотын Баянзүрх дүүрэг болон Улиастай орчмын дахин төлөвлөлтийн хүрээнд бий болох орон сууцны шинэ хорооллуудыг дулааны эрчим хүчээр хангана. Мөн дараах давуу талууд үүсэж байна. Үүнд:

  • “Амгалан дулааны станц” ТӨХК-ийн дулааны эрчим хүчний үйлдвэрлэл 1.3 сая Гкал/цагаар нэмэгдсэн;
  • Улаанбаатар хотын Баянзүрх дүүргийн дахин төлөвлөлтөөр баригдах 12.000 айлын орон сууцны шинэ хороолол, 14 сургууль, цэцэрлэг төвлөрсөн дулаан хангамжийн системд холбогдоно;
  • Зуухнаас гарах хаягдал үнсийг үнсэн санд хаях ажиллагааг зогсоож, дүүргэгч бодисоор бетон зуурмагийн үйлдвэрүүдэд түүхий эдийн зориулалтаар нийлүүлнэ;
  • 40 гаруй нам даралтын халаалтын зуухны үйл ажиллагааг зогсоож, агаар орчны бохирдлын хэмжээг бууруулна;
  • Нүүрс хадгалах 10 мян.тн багтаамжтай агуулах баригдаж, хүрээлэн буй орчныг бохирдуулахгүй хадгалагдах нөхцөл бүрдсэн;
  • Өргөтгөлийн хүрээнд 32 байнгын ажлын байр нэмэгдсэн зэрэг давуу талууд гарсан юм.

Нийслэл хотын төвлөрсөн дулаан хангамжийн системийн суурилагдсан хүчин чадал 2534 Гкал/цаг байгаа боловч холбогдсон хэрэглээ 2992 Гкал/цагт хүрч суурилагдсан хүчин чадлаас 18 хувиар давсан үзүүлэлттэй байна. Энэхүү өргөтгөл ашиглалтад орсноор даваад буй ачаалал 100 Гкал/цаг-аар буурах юм.

Эх сурвалж: ЭХЯ

Хүүхдийн паркийн баруун жигүүрийн 10.2 га талбайн 80 хувьд ногоон байгууламж, 20 хувьд тухлах талбай байгуулна
Хүүхдийн паркийн баруун жигүүрийн 10.2 га талбайн 80 хувьд ногоон байгууламж, 20 хувьд тухлах талбай байгуулна
 
Вьетнамын Далайн Их сургуульд тэтгэлгээр суралцахыг урьж байна
Вьетнамын Далайн Их сургуульд тэтгэлгээр суралцахыг урьж байна
Сэтгэгдэл (0)
Анхаар!
Та сэтгэгдэл бичихдээ Монгол Улсын хууль болон ёс суртахууны хэм хэмжээг баримтална уу. Мэдээний сэтгэгдлийн хэсгийг mpress.mn сайт хариуцах тул, ёс бус сэтгэгдлийг админ устгах эрхтэй.