/2022.08.09/: Соёлын яамны дэргэд соёл, урлагийн 14 чиглэл, 21 аймаг орон нутагт соёлын салбарын Залуучуудын хөгжлийн зөвлөл байгуулан, салбарын хөгжилд залуусын оролцоо манлайллыг нэмэгдүүлэхэд анхаарч ажиллаж байна.
Жил бүрийн наймдугаар сарын 12 - “Олон улсын залуучуудын өдөр”, наймдугаар сарын 25 - “Монголын Залуучуудын өдөр” тохиодог ба наймдугаар сарыг “Залуучуудын хөгжлийн сар” болгон тэмдэглэн өнгөрүүлж, салбар бүр залуучуудын асуудалд анхаарлаа хандуулж, тэдэнд зориулсан олон талт арга хэмжээг зохион байгуулж, залууст ээлтэй шийдвэр гарган ажиллахыг Монгол Улсын Засгийн газар болон НҮБ-ын Хүн амын сангаас уриалдаг.
"Залуучуудын хөгжлийн сар"-ын хүрээнд Соёлын яам салбарын залуучуудаа дэмжин “Нүүдэлчин Монгол 2022” соёлын биет бус өвийн их фестивальд “Соёлын өвийн хүрээ-үзэнгээ суралцъя” үйл ажиллагаанд соёлын биет бус өвөө өвлөн уламжлагч залуус өөрсдийн бүтээл туурвилаараа оролцохоос гадна, хүүхэд залууст зааж сургах, фестивалийн зохион байгуулалтад орж ажиллахаар бэлтгэл ажлаа хангаж байна.
“Нүүдэлчин Монгол 2022” соёлын биет бус өвийн их фестивальд:
- Соёлын яамны Залуучуудын хөгжлийн зөвлөл
- Соёлын биет бус өвийг өвлөн уламжлагч залуучуудын хөгжлийн зөвлөл
- Соёл, урлагийн менежер залуучуудын хөгжлийн зөвлөл
- Дүрслэх урлагийн залуучуудын хөгжлийн зөвлөл
- Тайз дэлгэцийн урлагийн залуучуудын хөгжлийн зөвлөл
- Дууны урлагийн залуучуудын хөгжлийн зөвлөл
- Баян-Өлгий аймгийн Соёлын салбарын залуучуудын хөгжлийн зөвлөлөөс
бүрдсэн нийт 32 залуус Соёлын биет бус өвийн 7 ай савын хүрээнд Эх хэл, аман уламжлал, илэрхийлэл, Ардын язгуур урлаг, Уламжлалт баяр наадам, зан үйл, ёс, тоглоом наадгай уриа дуудлага, Байгалийн болон сав шим ертөнцийн тухай мэдлэг, зан үйл, Уламжлалт арга ухаан, Уламжлалт гар урлалын өргөө, Хүүхдийн хүрээний нэгдсэн хөтөлбөрт орж ажиллах юм.
Эх сурвалж: Соёлын яам
