/2022.03.29/: Комиссын гишүүн Д.Сүнжидээр ахлуулсан Ажлын хэсэг Өвөрхангай аймгийн Хархорин сум дахь ШШГЕГ-ын харьяа 423 дугаар нээлттэй, хаалттай хорих ангид 2022 оны гуравдугаар сарын 28,29-ний өдрүүдэд ажиллаж байна.
Ажлын хэсгийг тус ангийн захирагч хурандаа Б.Түвшинтөгс хүлээн авч уулзаж, ангийн нөхцөл байдал болоод хийж хэрэгжүүлж буй ажлаа танилцууллаа.
Ажлын хэсгийнхэн хяналт шалгалтын хүрээнд хорих ангид ял эдэлж буй хоригдлуудын Монгол Улсын Үндсэн хууль, хууль, олон улсын гэрээгээр баталгаажуулсан эрх, эрх чөлөөний хэрэгжилт хүний эрхийн үндсэн зарчимд нийцэж буй эсэхэд хяналт шалгалтын ажлыг хийж, илэрсэн зөрчлийг таслан зогсоох, зөрчил гаргасан албан тушаалтанд хариуцлага тооцуулах, хүний эрхийн зөрчлөөс урьдчилан сэргийлэх, хамгаалах чиглэлд түлхүү анхаарч ажиллаж байна.
Шалгалтаар хоригдлуудын хөдөлмөр эрхлэлтийн байдлыг судалж, Монгол Улсын нэгдэн орсон олон улсын гэрээ, конвенц, дотоодын хууль тогтоомжоор баталгаажулсан хөдөлмөрлөх эрхийн хэрэгжилтэд үнэлгээ өгөх, хорих анги дахь албадан хөдөлмөрийн нөхцөл байдлыг судалгаагаар тодорхойлох юм. Ажлын хэсгийн бүрэлдэхүүнд ХЭҮК-ын Гомдол, хяналт шалгалтын хэлтсийн ахлах референт Г.Ууганбаатар, референт Б.Нандинцэцэг, Б.Мөнх-Эрдэнэ, Б.Наранбаатар, мэргэжилтэн Б.Болор, О.Энхболд нар багтаж буй.
Эх сурвалж: ХЭҮК
