/2021.09.29/: Уул уурхайн бүтээгдэхүүний биржийн тухай хуулийн төслийг боловсруулж буйтай холбоотой салбарын мэргэжилтнүүдийн хэлэлцүүлэг боллоо.

Уул уурхай, хүнд үйлдвэрийн сайд Г.Ёндон хэлэлцүүлгийг нээж хэлсэн үгэндээ "Энэхүү хуулийн төсөл батлагдсанаар уул уурхайн бүтээгдэхүүний арилжааг шударга, нээлттэй, ил тод зохион байгуулж, зах зээлийн бодит үнэ тогтоох боломжийг хангаснаар уул уурхайн салбарт хөрөнгө оруулах сонирхлыг нэмэгдүүлэх, улс орны эдийн засгийн өсөлтөд энэ салбарын оруулах хувь нэмрийг улам өргөжүүлэх боломж нээгдэнэ" гэлээ.

Хуулийн төслөөр татварын суурь тэлж, уул уурхайг дагасан дэд бүтэц, бусад салбарын хөгжлийг давхар тэлэх ач холбогдолтой юм. Нөгөө талаас татвар зохистой байх зарчмын дагуу ашигт малтмалын нөөц ашигласны төлбөрийг жишиг үнээс илүүтэйгээр зах зээлд борлуулж буй бодит үнээс тооцож татвар ногдуулах боломжийг бий болгох нь уул уурхайн компаниудын үйл ажиллагаанд ихээхэн дэмжлэг болно гэдгийг онцолсон.