/2023.04.20/: Йемений нийслэл Сана хотод лхагва гарагийн шөнө хэт олон хүн бөөгнөрсний улмаас олон арван хүн амь үрэгдсэн байна.

Энэхүү хэрэг явдал Исламын ариун Рамадан сар дуусч буй лалын шашинтнуудын Ид аль-Фитр баяр болохоос хэдхэн хоногийн өмнө болсон байна. Сарын энэ үед хүмүүс "Зекат аль-Фитр" гэж нэрлэгддэг өглөгийг тусламж хэрэгтэй хүмүүст өгдөг уламжлалтай аж.

Худалдаачид заншлын дагуу мөнгө тарааснаас энэхүү осол гарсан байна. Харин мөнгө тараахынхаа өмнө Дотоод хэргийн яамнаас зөвшөөрөл хүсэх ёстой байсан хэдий ч худалдаачид зөвшөөрөлгүйгээр эл үйлдлийг хийжээ.

Амиа алдагсдын тоо 78 хүрсэн бөгөөд олон арван хүн шархадсан байгаа аж. Ослын газарт Нийслэлийн цагдаагийн газар болон холбогдох албаныхан шуурхай ажилласан бөгөөд хэргийн холбогдогчоор мөнгө тараасан хоёр худалдаачинг баривчилсан байна.

Эх сурвалж: CNN