/2022.12.28/: Шүүхийн шийдвэр гүйцэтгэх ерөнхий газрын харьяа Мэргэжлийн сургалт, үйлдвэрлэлийн төвд “Керамик эдлэл урлаач” мэргэжлээр суралцсан анхны 14 хүмүүжигчид Чадамжийн гэрчилгээ гардуулах үйл ажиллагаа 429 дүгээр хаалттай хорих анги-Төрөлжсөн мэргэшлийн эмнэлэгт 2022 оны 12 дугаар сарын 23-нд боллоо.
Хорих ял эдлүүлэх албаны Сургалт, нийгэм, сэтгэл зүйн хэлтсээс хоригдлын чөлөөт цагийг зөв боловсон өнгөрүүлэх, нийгэмшүүлэх ажлыг үр дүнтэй явуулах, хоригдолд хөдөлмөрийн дадал, мэргэжлийн боловсрол олгох, Хорих байгууллагад 1980-иад оноос хойш тасраад байсан керамикийн үйлдвэрлэлийг сэргээх зорилгоор Шүүхийн шийдвэр гүйцэтгэх ерөнхий газрын даргад холбогдох саналыг тавьсны дагуу дагуу 2020 оноос эхлэн судалгаа хийж 2020 онд 429 дүгээр хаалттай хорих анги-Төрөлжсөн мэргэшлийн эмнэлэгт “Керамик сургалтын төв”-ийг байгуулсан.
Шүүхийн шийдвэр гүйцэтгэх ерөнхий газрын харьяа 429 дүгээр хаалттай хорих анги-Төрөлжсөн мэргэшлийн эмнэлэгт сүрьеэгээр өвдсөн хоригдлуудыг эмчилж, эдгэрсний дараах хяналтад 6 сараас 2 жил хугацаанд байдаг онцлогыг харгалзан уг хорих ангийн сонгон сургалтыг эхлүүлсэн.
Түүнчлэн сургалтын чанар, суралцагчдын чадавхийг сайжруулахад анхаарч сургалтыг зохион байгуулан явуулж буй багш, дэд ахлагч Т.Шинэ-Цэцэгийг Боловсролын их сургуулийн “Багшлэх эрхийн сургалт”-ад хамруулан багшлах эрхийг олгосон байна.
Мөн Шүүхийн шийдвэр гүйцэтгэх ерөнхий газрын харьяа Мэргэжлийн сургалт, үйлдвэрлэлийн төвд “Керамик эдлэл урлаач” мэргэжлээр шинэ анги нээж, Боловсролын үнэлгээний төвд хандсанаар 2021 оноос албан ёсны “Чадамжийн гэрчилгээ” олгох эрхээ авсан байна.
Эх сурвалж: ШШГБ
