/2022.11.08/ Дархан-Уул аймгийн Оюуны Ирээдүй цогцолбор сургуулийн цайны газарт хортой хий цацсаны улмаас багш, сурагчдын бие муудан, тухайн аймгийн Нэгдсэн эмнэлэгт хүргэгджээ.

Тодруулбал, яаралтай түргэн тусламжийн машинаар эмнэлэгт хүргэгдсэн хүүхдүүдэд амьсгал боогдох, нулимс асгарах, ханиалгах шинж тэмдэг илэрч байгаа аж.

Тухайн сургуулийн Нийгмийн ажилтан, "Хүүхэд гэрээсээ нулимс асгаруулагч авчраад, улмаар цацсан. Сургуулиас ямар нэг газ алдаагүй, дэлбэрээгүй" гэж мэдээлсэн байна.

Түүнчлэн Дархан-Уул аймгийн Нэгдсэн эмнэлгийн Эмчилгээ эрхэлсэн орлогч дарга:

-Одоогоор 40 орчим хүүхэд хүргэгдэн ирсэн байна. Зарим хүүхдийн биеийн байдал хүндэвтэр, заримынх нь бие тогтворжиж байна. Ухаан алдсан хүн бүртгэгдээгүй. Харин ухаан самуурсан 2 хүүхэд ирсэн. Гэхдээ амин үзүүлэлтүүд нь сайн байгаа гэв.

Одоогоор тус сургууль дээр Онцгой байдлын газрын химийн мэргэжилтэн болон цагдаагийн байгууллагын ажилтнууд ажиллаж байгаа ажээ.