/2022.10.28/: БНАСАУ Солонгосын хойгийн зүүн эргийн ус руу ойрын тусгалтай хоёр баллистик пуужин харвасан гэж Өмнөд Солонгосын армийн албаныхан мэдэгдлээ.
Пуужингуудыг Хойд Солонгосын зүүн Кангвон мужийн Тунчон мужаас өглөөний 11:59-12:18 цагийн хооронд харвасан байна. Уг пуужин 230 км зайг туулж, 24 км өндөрт ниссэн гэж Өмнөд Солонгосын Штабын дарга нарын нэгдсэн хороо (JCS) мэдэгдэв.
Энэхүү туршилт нь хойгийн энх тайван, тогтвортой байдалд заналхийлсэн "ноцтой өдөөн хатгалга" бөгөөд Умард Солонгос баллистик пуужин хөөргөхийг хориглосон НҮБ-ын Аюулгүйн зөвлөлийн тогтоолыг "илэрхий зөрчсөн" гэж JCS мэдэгдлээ.
АНУ-ын арми Хойд Солонгосын пуужин харваж байгааг мэдэж байгаа бөгөөд энэ нь "АНУ-ын бие бүрэлдэхүүн, нутаг дэвсгэр болон манай холбоотнуудад шууд аюул занал учруулахгүй" гэж мэдэгдэв.
Энэ жилийн дараалсан пуужингийн туршилтуудын талаар БНАСАУ-ын хэвлэлүүд зургаан сар чимээгүй байсан бөгөөд энэ туршилтууд нь Пхеньян Өмнөд дэх хүссэн бай руугаа тактикийн цөмийн цэнэгт хошуугаар харвахад бэлэн байгааг харуулах зорилготой байсан гэж мэдэгджээ.
Ирэх долоо хоногт Өмнөд Солонгос АНУ-тай АНУ-ын үл үзэгдэх F-35B онгоцыг оролцуулан томоохон хэмжээний хамтарсан агаарын цэргийн сургуулилт хийх гэж байна гэж Өмнөд Солонгосын Агаарын цэргийн хүчин мэдэгдэв.
Хойд Солонгосын удирдагч Ким Чен Ун дэлхийн мөргөлдөөн ширүүсч байгаа энэ үед үндэстнийхээ зэвсгийг зориудаар харуулах замаар мессеж илгээж болзошгүй гэж шинжээчид өмнө нь CNN-д ярьж байсан.
Өмнөд Солонгос болон АНУ-ын албаны хүмүүс Хойд Солонгос 2017 оноос хойш долоо дахь удаагаа цөмийн туршилт хийхээр бэлтгэж байж болзошгүйг анхааруулсаар байна.
НҮБ-ын Цөмийн асуудал эрхэлсэн байгууллагын тэргүүн пүрэв гарагт сэтгүүлчдэд хэлэхдээ, Хойд Солонгосын болзошгүй цөмийн туршилтын талаар "бүгд амьсгаа даран харж байна" гэж хэлсэн юм.
Эх сурвалж: CNN
