2022.10.27/: Өнгөрсөн лхагва гарагт нийслэл Сөүлээс Хойд Солонгосын дүрвэгчийн ялзарсан шарил олдсоны дараа Өмнөд Солонгосын эрх баригчид мөрдөн байцаалтын ажиллагааг эхлүүлжээ.
Цагдаа болон Өмнөд Солонгосын Нэгдлийн яамны мэдээлснээр, дүрвэгч нь 2002 онд Өмнөд Солонгос руу оргосон 40 гаруй насны эмэгтэй байжээ.
Энэхүү эмэгтэй нь хэд хэдэн түрээсийн орон сууцны төлбөрөө төлөөгүй зугтаж байсан тул нийтийн орон сууцны компани болох Сөүлийн орон сууцны компани ажилчдаа түүний байранд очиж үзэхээр илгээсэн бөгөөд тэд цогцсыг нь олсон гэж Сөүл хотын цагдаагийн газар мэдэгдэв.
Түүний бие бараг "араг яс" болтлоо муудсан байсан гэж цагдаа нар мэдэгдэв. Өмссөн өвлийн хувцаснаас нь харахад цагдаа нар түүнийг нас бараад жил орчим болж байгаа гэж сэжиглэж байгаа ч задлан шинжилгээний дараа илүү нарийн мэдээлэл өгнө гэв.
Энэ эмэгтэй 2011-2017 онд Нэгдлийн яамны харьяа Солонгосын Хана санд зөвлөхөөр ажиллаж, бусад дүрвэгсдийг Өмнөд рүү нүүлгэн шилжүүлэхэд тусалсан гэж тус яам мэдэгдэв.
Өмнөд Солонгосын эрх баригчид Хойд Солонгосоос дүрвэгсдийг нүүлгэн шилжүүлэх үйл явцад нь тогтмол хяналт тавьж, халамжийн шалгалт хийдэг ч 2019 онд эмэгтэй цагдаа нараас хамгаалалтын үйлчилгээгээ сунгахгүй байхыг хүссэн гэж Сөүлийн цагдаагийн газраас мэдэгдэв.
Цагдаагийн байгууллагаас Шүүхийн шинжилгээний үндэсний албанд шалгуулахаар хүсэлт гаргасан гэдгээ мэдэгдлээ.
Нэгдлийн яамны албан тушаалтан энэ хэрэг "маш харамсалтай" гэж мэдэгдээд, яам Хойд Солонгосоос дүрвэгсдийн хяналтын тогтолцоог дахин шалгаж, сайжруулах шаардлагатай газруудад ажиллана гэж нэмж хэлэв.
1998 оноос хойш 33,000 гаруй хүн Хойдоос Өмнөд Солонгос руу дүрвэсэн гэж Нэгдсэн яам мэдээлсэн байна.
Цар тахал эхэлснээс хойш дүрвэгсдийн тоо эрс буурч, 2019 онд 1,000 гаруй дүрвэгч байсан бол энэ он гэхэд ердөө 42 дүрвэгч бүртгэгдсэн байна.
Өмнөд Солонгост амжилттай дүрвэж очсон хүмүүс соёлын цочролд орох, Өмнөд Солонгосын зарим иргэдийн дайсагнал, санхүүгийн дарамт, тус улсын өрсөлдөөнтэй хөдөлмөрийн зах зээлд ажил олоход бэрхшээлтэй тулгардаг байна.
Эх сурвалж: CNN
