/2022.09.12/: 2022-2023 оны хичээлийн шинэ жил эхлээд удаагүй байна.
Сүүлийн гурван жилийн хугацаанд хичээл, сургуульдаа бүрэн цуглаагүй хүүхэд багачуудын баярлаж хөөрсөн сэтгэл одоо ч үргэлжилсээр. Урьд өмнөх жилүүдээс хэд хэдэн онцлогтой хичээлийн шинэ жил эхэллээ.
СУРГУУЛИЙН ӨМНӨХ БОЛОВСРОЛ БУЮУ ЦЭЦЭРЛЭГ
Энэ хичээлийн жил Улаанбаатар хотод төрийн өмчийн 279, хувийн өмчийн 400 цэцэрлэгт нийтдээ 113 мянга гаруй багачууд хамрагдсан байна. Улаанбаатар хотод бүртгэлтэй цэцэрлэгийн насны хүүхдийн тоо 141 мянга бол одоо байгаа хүчин чадал нь 106 мянга байна.
Цэцэрлэггүй үлдэж мэдэх 34 мянга гаруй багачуудыг цэцэрлэгт бүрэн хамруулах шийдлийг өнгөрсөн дөрөвдүгээр сард гаргасны дагуу салбарын яам, нийслэлийн зүгээс эрчимтэй хамтран ажиллаж 22 мянга гаруй хүүхдийг цэцэрлэгт сургах нөхцөл боломжийг олгоод байна. Энэ жилийн гол онцлог бол цэцэрлэгийн сугалааг халсан явдал юм.
Иргэдийн сэтгэгдлээс...
-Манай хүүхэд энэ жил анх удаа цэцэрлэгт орж байгаа. Сугалаагүйгээр оруулдаг болсонд маш их баяртай явна. Урьд нь хүүхдүүдийг сугалаагаар оруулдаг байхад маш их бухимдал, стресстэй байсан.
-Хүүхдээ цэцэрлэгт өгч чадахгүйгээс болж маш олон ээж нар гэртээ суудаг байсан. Ганцхан аавууд ажил, орлоготой байхаар өрхийн ахуй амьдрал, санхүүд маш хохиролтой байдаг. Одоо бол ээж, аав хоёр хоёулаа хийх боломж олдож буй нь хамгийн чухал.
-Айл бүрийн хүүхдүүд цэцэрлэгтэй, аав ээжүүд нь ажилтай байх юм бол гэр бүл, тэр дундаа залуу гэр бүлд маш том дэмжлэг болно. Айл өрх аз жаргалтай байх нэг үндсийг тавилаа гэж харж байна.
-Манай Баянгол дүүргийн 18 дугаар хорооны хувьд цэцэрлэгийн хүртээмж харьцангуй гайгүй. Гэхдээ ноднин тойргийн бус цэцэрлэгт явуулж байсан бол энэ жил тойргийн цэцэрлэгтээ ороод бүр амар болж байна.
-Энэ удаагийн шийдэл бол маш дэвшилттэй шийдэл гэдгийг онцолмоор байна. Боловсролын яам болоод НЗДТГ-аас хийж буй ажлуудын талаар уншихад багагүй зүйл хийж буй нь мэдрэгдэж байгаа. Харин хүмүүс тэр бүр сонсоогүй, мэдээгүй бол тэр тухай тодорхой мэдээлэл өгөх хэрэгтэй байхаа.
Иргэд ийн өгүүлж байна. Сургуулийн өмнөх боловсролын хүртээмж, хамран сургалтыг нэмэгдүүлэх зорилгоор ойрын хугацаанд хэд хэдэн ажлыг хэрэгжүүлэхээр төлөвлөжээ. Үүнд:
-Ачаалал өндөртэй, өргөтгөх бололцоотой цэцэрлэгүүдийг өргөтгөн, зарим хороонд шинээр цэцэрлэг барих, өргөө буюу цомцог цэцэрлэгийг олноор байгуулах
-Он дамжин хэрэгжиж буй барилга угсралтын ажил нь 70 хувиас дээш гүйцэтгэлтэй цэцэрлэгийн барилгын дутагдалтай хөрөнгийг шийдвэрлэн яаравчлан ашиглалтад оруулах
-Ачаалал өндөртэй байршлуудад цэцэрлэгийн зориулалтаар байр түрээслэх
-Хувийн цэцэрлэгийн сул орон тоонд нэмэлт элсэлт зохион байгуулж, хувьсах зардлыг хоёр дахин нэмэгдүүлж олгох
-Байгууллагын дэргэд цэцэрлэгийн салбар бүлгийг байгуулах
-Хувийн цэцэрлэг байгуулах санаачилгыг дэмжих зэрэг хэд хэдэн ажлыг төлөвлөөд байна.
Нийслэлийн Засаг дарга бөгөөд Улаанбаатар хотын Захирагч Д.Сумъяабазар:
-Монгол Улсын Засгийн газраас нийслэл Улаанбаатар хотод сургууль, цэцэрлэгийн хүртээмжийг нэмэгдүүлэх, хамран сургах тойрогт нь хүүхдүүдийг хамруулах үүрэг чиглэлийг өгч, тэр хүрээнд нийт 200 тэрбум төгрөг төлөвлөсний 100 тэрбумыг нийслэлээс санхүүжүүлж байгаа. Түүнчлэн тун саяхан Хотын асуудал хариуцсан сайдтай боллоо. Энэ нь Улаанбаатар хотын 1.6 сая хүн амын амьдралын ая тухтай байдлыг хангах, нийгэм эдийн засгийн тулгамдсан асуудлыг шийдэх, түгжрэлийг бууруулж, төвлөрлийг сааруулах их ажлыг нугалахад, бодлогын түвшинд жин дарах шийдвэр байлаа.
Сургууль, цэцэрлэгийн хүртээмжийг сайжруулах ажил ч үүнтэй уялдаж байна. Цааш өргөжөөд хүүхдүүдээ хамран сургах тойргийн хүрээнд сургадаг болгох асуудлыг Засгийн газар, Боловсрол шинжлэх ухааны яамтай хамтран нийслэл хот зохион байгуулж буй юм. Нийслэлийн санхүүгийн чадамжийг нэмэгдүүлэх, түүний дараа цогц шийдэл судалгаанд тулгуурлан бодлого боловсруулах боломж бүрэн бий. Бид Засгийн газраас өгсөн үүрэг даалгаврыг амжилттай биелүүлж явна хэмээн өгүүллээ.
ЕРӨНХИЙ БОЛОВСРОЛЫН СУРГУУЛЬ
2022-2023 оны хичээлийн жилд Улаанбаатар хотод Ерөнхий боловсролын 290 сургууль үйл ажиллагаа явуулж байна. Энэ жилийн тухайд хамран сургах тойргийг шинээр баталсан бөгөөд тэрхүү тойргийн хуваарилалтын дагуу хүүхдүүд сургуульдаа суралцаж байна. Ингэснээр замын түгжрэлийг бууруулахад тодорхой хэмжээнд нөлөөлнө гэж харж байгаа юм. Учир нь Улаанбаатар хотод бүртгэлтэй 640 мянган орчим тээврийн хэрэгсэл байгаагаас 150 мянга орчим нь зөвхөн хүүхдээ сургууль, цэцэрлэгт нь зөөх зорилгоор хөдөлгөөнд оролцдог болохыг Тээврийн цагдаагийн албанаас судлан тогтоожээ.
Энэ хичээлийн шинэ жилийн нээлтэд Монгол Улсын Ерөнхийлөгч “Монгол уламжлал, монгол өв соёл-Монголын их амар амгалан” сэдвээр хичээл заасан. Хүүхдийн сэтгэл зүйл хүмүүжил, эрүүл монгол хүнийг хүмүүжүүлэхэд анхаарч байгаа. Энэ талаар Нийслэлийн Засаг дарга бөгөөд Улаанбаатар хотын Захирагч Д.Сумъяабазар хэлэхдээ “Онцлох гурван зүйл бий.
- Нэгдүгээрт эрдэм боловсрол оюун.
- Хоёрдугаар сэтгэлзүйн чадвар,
- гуравдугаарт бие бялдын зөв тэгш хүмүүжил.
Энэ гурвыг тэгш эзэмшсэн монгол хүнийг хүмүүжүүлэх нь бидний үүрэг байх юм. Сэтгэлзүйн болоод бие бялдрын хүмүүжил орхигдоод байгааг цаашид анхаарч ажиллах нь чухал байна. Сэтгэлзүйг төлөвшүүлэхийн тулд сэтгэл засалчийг бас бэлтгэх нь зөв санагддаг. Мөн биеийн тамир, спортыг хөгжүүлэх, адаглаад л зөв алхаж, зөв гүйх аргыг хүүхдүүдэд таниулах учиртай. Засаг даргын хувьд энэ тал дээр анхаарч, 3х3 сагсан бөмбөгийн талбай байгуулах ажлыг дэмжин ажиллаж байна.
Хүүхдүүд чөлөөтэй алхах, дугуй скийт, скутер унах талбайг олноор бий болгож, ногоон байгууламжийг нэмэгдүүлэх, спортын байгууламжуудыг нэмэгдүүлэх бодлогыг мөн баримталж байгаа. Энэ бол хүүхдүүдийг дэлгэцийн хамаарлаас хөндийрүүлж, илүүдэл жингүй байлгахад дэм болохын сацуу том зургаараа бол олимпизмыг дэмжих, дунд болоод урт хугацаанд зөв монгол хүн бий болгох бодлого юм” хэмээн өгүүллээ.
Монгол Улсын Засгийн газар болон Нийслэлийн Засаг даргын үйл ажиллагааны мөрийн хөтөлбөрт “Сургуулийн автобус” төслийг хэрэгжүүлэхээр тусгасан. Энэ хүрээнд энэ жил 245 автобус сурагчдад үйлчлэх юм. Сурагчдын автобус есдүгээр сарын 5-ны өдрөөс үйлчилгээнд гараад байна. Ерөнхий боловсролыг тэгш, хүртээмжтэй хүргэх зорилгын хүрээнд хөгжлийн бэрхшээлтэй хүүхэд багачуудад чиглэсэн бодлогыг орхигдуулахгүйг хичээж байгаагаа Хотын дарга онцоллоо.
НҮБ-ын дэргэдэх Хүүхдийн сан буюу ЮНИСЕФ (UNICEF)-тэй хамтран тусгай сургуулийг дэмжсэн үйл ажиллагааг эхлүүлж буй ажээ. Түүнчлэн цаашид судалгаанд дүүрэг дүүргийн онцлогт тохирсон ажлуудыг 2023 онд эрчимжүүлж хийнэ. Үүн дотор сургууль цэцэрлэгийн хүрэлцээ, хангамж, хүртээмж, эрүүл мэндийн үйлчилгээг онцлон багтаах ажээ. Энэ бүхэн “Иргэн төвтэй Улаанбаатар” зорилтод багтаж байгаа билээ.
Эх сурвалж: НЗДТГ
