/2022.08.30/ УИХ-ын ээлжит бус чуулганы хуралдаан болж, шинэ сайд нар өнөөдөр тангарагаа өргөлөө. Үүнтэй холбоотойгоор Ерөнхий сайд Л.Оюун-Эрдэнийн Засгийн газрын бүрэлдэхүүнд багтсан, шинэ сайд нарын 2019, 2020, 2021 оны хөрөнгө орлогын мэдүүлэг /ХОМ/-ийг танилцуулж байна.

Засгийн газрын Хэрэг эрхлэх газар /ЗГХЭГ/-ын даргаар томилогдсон Д.Амарбаясгалангийн хөрөнгө орлогын мэдүүлэг АТГ-ын цахим хуудсанд байршаагүй байна.

Н.УЧРАЛ САЙД 1.6 ТЭРБУМ ТӨГРӨГИЙН ХАДГАЛАМЖТАЙ, ӨРГҮЙ

Цахим хөгжил, харилцаа холбооны сайд Н.Учралын өөрийн орлого 803 сая. Гэр бүлийн орлого нь 196 сая төгрөг. Тэрээр 1.6 тэрбум төгрөгийн хадгаламжтай. Шинээр томилогдсон сайд нар дундаас хамгийн өндөр үнийн дүнтэй буюу 685 сая төгрөгийн тээврийн хэрэгсэлтэй.

САЙД С.БЯМБАЦОГТ 3,8 ТЭРБУМ ТӨГРӨГИЙН ОРОН СУУЦТАЙ

Зам тээвэр, хөгжлийн сайдаар томилогдсон С.Бямбацогт 3,8 тэрбум төгрөгийн орон сууцтай. Мөн 4,9 тэрбум төгрөгийн авлагатай. АВТОМАШИНГҮЙ, ЗЭЭЛГҮЙ. Түүний өөрийн орлого 43 сая төгрөг.

Ж.ГАНБААТАР САЙД 6,4 ТЭРБУМ ТӨГРӨГИЙН ХАДГАЛАМЖТАЙ

Уул уурхай, хүнд үйлдвэрийн сайд хамгийн өндөр буюу 6,4 тэрбум төгрөгийн дотоодын хадгаламжтай. Түүнчлэн 1.1 тэрбум төгрөгөөр үнэлэгдэх орон сууцтай. Ямар нэг авлагагүй, мөн өргүй.

ЭРЧИМ ХҮЧНИЙ САЙДЫН ОРЛОГО 5 ТЭРБУМААС 43 САЯ ТӨГРӨГ
БОЛТЛОО БУУРЧЭЭ

Эрчим хүчний сайдаар томилогдсон Б.Чойжилсүрэнгийн өөрийн орлого 2020 онд 5 тэрбум байж байгаад 2021 онд 43 сая төгрөг болж буурчээ. Тэрээр 404 төгрөгийн хадгаламжтай. 365 сая төгрөгийн орон сууцтай.

ХӨДӨӨ АЖ АХУЙН САЙД 2,4 ТЭРБУМЫН ОРОН СУУЦТАЙ,
1,3 ТЭРБУМ ТӨГРӨГИЙН ХАДГАЛАМЖТАЙ

ХХААХҮ-ын сайд Х.Болорчулууны гэр бүлийн орлого нэг жилийн хугацаанд 6 сая төгрөгөөс 295 сая төгрөг болж нэмэгджээ. Тэрээр 2,4 тэрбум төгрөгийн орон сууцтай, 1.3 тэрбум төгрөгийн хадгаламжтай.

Д.САРАНГЭРЭЛ САЙДЫН ГЭР БҮЛИЙН ОРЛОГО 1.3 ТЭРБУМААС
3.1 ТЭРБУМ БОЛТЛОО ӨСЖЭЭ

Сайд Д.Сарангэрэлийн гэр бүлийн орлого 2020 онд 1.3 тэрбум байж байгаад 2021 онд 3.1 тэрбум болтлоо өсжээ. Харин 2019 онд 397 сая төгрөг байсан байна. Тэрээр ҮНЭТ ЭДЛЭЛГҮЙ. 501 сая төгрөгийн хадгаламжтай.

ЭДИЙН ЗАСАГ, ХӨГЖЛИЙН САЙД ХАМГИЙН БАГА ОРЛОГОТОЙ

Шинээр томилогдсон сайд нар дотроос Эдийн засаг, хөгжлийн сайд Ч.Хүрэлбаатар хамгийн бага орлоготой буюу түүний өөрийн орлого 42 сая төгрөг. Харин түүний гэр бүлийн орлого 115 сая төгрөг байна. Тэрээр 303 сая төгрөгийн орон сууц, 15 сая төгрөгийн үнэт эдлэлтэй. АВТОМАШИНГҮЙ, АВЛАГАГҮЙ, ЗЭЭЛГҮЙ.

Ж.СҮХБААТАР САЙД 405 САЯ ТӨГРӨГИЙН АВЛАГАТАЙ, ӨРГҮЙ

Нийслэлийн асуудал эрхэлсэн сайд Ж.Сүхбаатар 405 сая төгрөгийн авлагатай, зээлгүй. 140 сая төгрөгийн үнэ бүхий тээврийн хэрэгсэлтэй. 790 сая төгрөгийн орон сууцтай.

САЙД Б.БАТ-ЭРДЭНЭ 100 САЯ ТӨГРӨГИЙН ҮНЭТ ЭДЛЭЛТЭЙ

Спорт, олимпизмын асуудал эрхэлсэн сайд 100 сая төгрөгийн үнэт эдлэл, 169 сая төгрөгийн тээврийн хэрэгсэлтэй. Түүний өөрийн орлого 45 сая, гэр бүлийн орлого 21 сая. Нийт 74 сая төгрөгийн хадгаламжтай.