/2022.08.22/ Шударга өрсөлдөөн, Хэрэглэгчийн төлөө газраас агентлагийн даргын 01/20 тоот удирдамжийн дагуу хүнсний зах, сүлжээ дэлгүүрүүдийн үйл ажиллагаа нь Өрсөлдөөний тухай хууль, Зар сурталчилгааны тухай хууль, Хэрэглэгчийн эрхийг хамгаалах тухай хууль, Засгийн газрын 2022 оны 199 дүгээр тогтоолд нийцэж байгаа эсэхэд хяналт шалгалт хийжээ.

Хяналт шалгалтын хүрээнд,

• хүнсний гол нэрийн бараа бүтээгдэхүүний үнэ бүрдэлт,
• лангуун дээрх үнэ кассын үнэтэй зөрүүтэй байгаа эсэх,
• жин хэмжээндээ хүрч буй эсэх,
• жин хэмжүүр баталгаажсан эсэх,
• эрүүл ахуй стандартын шаардлагыг хангаж буй эсэх,
• дэлгүүр, худалдааны төвүүдийн нийлүүлэгчидтэй хийж буй гэрээ нь өрсөлдөөний тухай хуулийг зөрчиж буй эсэх болон бусад хууль тогоомжийн хэрэгжилтийг шалган ажилласан байна.

Одоогоор шалгуулагчдаас ирүүлсэн нийлүүлэгчидтэй хийсэн гэрээ, тушаал шийдвэрүүдийг нягтлах ажил үргэлжилж байна гэж ШӨХТГ-өөс мэдээллээ. Мөн хяналт шалгалтаар илэрсэн зөрчил, авагдсан арга хэмжээний тухай мэдээллийг нэгтгэн иргэдэд мэдээлэх ажээ.