ОХУ-ын Сибирийн бүс нутагт уушгины тахлын халдвар тархсан байж болзошгүй гэх мэдээлэл гарч, таван эмнэлэгт хөл хорио тогтоосон тухай мэдээлэл олон улсын хэвлэлүүдэд тархаж байна.

Мэдээллээр, Эрхүү хот дахь Тахлын эсрэг хүрээлэнд лабораторийн шинжилгээний дээжтэй ажиллаж байсан 28 настай лабораторийн техникч Дарья Шипилова есдүгээр сарын 25-нд амьд Yersinia pestis нян агуулсан туршилтын хуруу шил хагалжээ.

Тэрбээр өчигдөр нас барсан гэх мэдээлэл гарсан бөгөөд өөд болсон шалтгаан лабораторийн осолтой холбоотой эсэхийг албан ёсоор тогтоох ажиллагаа явагдаж байна.

Үүний зэрэгцээ Эрхүү мужид халдварын болзошгүй тархалтаас урьдчилан сэргийлэх арга хэмжээ авч эхэлсэн гэх мэдээлэл байна. Тухайлбал, таван эмнэлэгт тусгаарлалт, хөл хорионы дэглэм тогтоосон гэх бөгөөд нийт 200 орчим хүнийг эмчийн ажиглалтад оруулжээ.

Мөн Эрхүү хотын томоохон хөнгөн цагааны үйлдвэрт ажилтнуудад амны хаалт хэрэглэх шаардлага тавьсан байна.

Уушгины тахал буюу Yersina Pestis нян гэж юу вэ?

Yersinia pestis нянгаар үүсгэгддэг тахал нь хүнд хэлбэрийн халдварт өвчин бөгөөд уушгины хэлбэр нь хүнээс хүнд амьсгалын замын дуслаар дамжих боломжтой.

Уушгины тахлын анхны шинж тэмдэг нь халдвар авснаас хойш ихэвчлэн 2–7 хоногийн дараа илэрдэг бөгөөд өндөр халуурах, жихүүдэс хүрэх, толгой өвдөх, сулрах, ханиалгах, амьсгал давчдах зэрэг шинж тэмдэг илэрч болно.

Хэрэв эмчилгээ хожимдвол уушгины тахал маш хүндэрч болзошгүй тул сэжигтэй тохиолдлыг эрт илрүүлж, тусгаарлан эмчлэх нь чухал.

АНУ-аас нислэгийг зогсоохыг уриалав

Энэ нөхцөл байдалтай холбоотойгоор АНУ-ын зарим улс төрчид ОХУ руу болон ОХУ-аас чиглэсэн арилжааны нислэгийг нөхцөл байдал тодорхой болтол түр зогсоох шаардлагатай гэсэн байр суурь илэрхийлсэн гэх мэдээлэл мөн гарч байна.

Гэхдээ тахлын дэгдэлт үнэхээр гарсан эсэх, халдвар хүнээс хүнд тархсан эсэх болон олон улсын зорчих хөдөлгөөнд хязгаарлалт шаардлагатай эсэх нь эрүүл мэндийн байгууллагуудын албан ёсны үнэлгээ, шинжилгээний үр дүнгээр тодорхой болох юм.

Одоогоор дээрх мэдээллүүдийн зарим нь албан ёсны эх сурвалжаар бүрэн баталгаажаагүй байгаа тул нөхцөл байдлыг ОХУ-ын эрүүл мэндийн болон халдварт өвчний байгууллагуудын албан мэдэгдлээр нягтлах шаардлагатай байна.

Эх сурвалж: Visegrad 24