/2023.12.05/: Баруун Суматра мужид галт уул дэлбэрсний улмаас Индонезид 11 уулчин амиа алдаж, 10 уулчин сураггүй алга болсон талаар албаныхан өчигдөр CNN агентлагт мэдэгдлээ.

Номхон далайн галт цагирагт оршдог Индонез улс нь 127 идэвхтэй галт уултай буюу дэлхийн хамгийн олон галт уултай бөгөөд Марапи уул нь тус улсын хамгийн идэвхтэй галт уулын нэг юм.

Марапи бол Суматра арлын хамгийн идэвхтэй галт уул бөгөөд 1979 оны 4-р сард дэлбэрэлт болж, 60 хүн нас барсан гэж Ройтерс агентлаг мэдээллээ.

Баруун Суматра дахь эрэн хайх, аврах багийн ахлагч Абдул Малик хэлэхдээ, "одоо ууланд 40 гаруй аврах баг ажиллаж байгаа бөгөөд дэлбэрэлт үргэлжилсээр байна. Амиа алдсан 11 уулчингаас гадна гурван уулчин эсэн мэнд олдсон ч 12 уулчин сураггүй хэвээр байгаа" гэжээ.

Даваа гарагийн өглөө шинэчилсэн мэдээллээр нийт 75 хүнийг, түүний дотор уулчдыг нүүлгэн шилжүүлж, бэртсэн хүмүүсийг эмнэлэгт хүргэсэн байна.

Гэрэл зургуудад машин, зам, ойролцоох тосгон бүхэлдээ үнсэнд дарагдсан байсныг харуулсан байна.

Марапигийн хөдөлгөөнийг ажиглаж буй албаны хүмүүс ням гаригт болсон галт уулын хайлсан лаав нь зам болон ойр орчмын гол мөрөнд хүрч болзошгүй талаар анхааруулсан байна.

Эх сурвалж: CNN