/2023.10.27/: АНУ-ын Батлан хамгаалахын сайд Ллойд Остин тус бүс нутаг дахь АНУ-ын цэргийн хүчний эсрэг хэд хэдэн нисгэгчгүй онгоц болон пуужингаар довтолсоны дараа пүрэв гарагт Сирийн зүүн хэсэгт орших Ираны дэмжлэгтэй зэвсэгт бүлэглэлтэй холбоотой хоёр объектод агаараас цохилт өгсөн гэв.
Мэдэгдэлд эдгээр байгууламжуудыг Ираны Исламын хувьсгалт гвардийн корпус (IRGC) болон түүнтэй холбоотой бүлгүүд ашигладаг байсан гэжээ.
Хос F-16 сөнөөгч онгоцууд нарийн удирдлагатай сум ашиглан Сири, Иракийн хилийн ойролцоох Абу Камал дахь зэвсэг, сум хадгалах агуулахыг онилсон байна.
Остин Ерөнхийлөгч Жо Байдены тушаалаар өгсөн энэхүү цохилтуудыг "өөрийгөө хамгаалах зориулалттай цохилт байсан" гээд, Газын зурваст үргэлжилж буй мөргөлдөөнөөс тусдаа гэдгийг онцлон тэмдэглэв. Тэрээр мэдэгдэлдээ Ираныг АНУ-ын хүчин рүү чиглэсэн дайралтад чухал үүрэг гүйцэтгэсэн хэмээн буруутгаж, “Иран манай хүчний эсрэг хийсэн эдгээр халдлагуудад оролцоогүй гэж байна. Бид үүнийг зөвшөөрөхгүй" гэв. Остин мөн Ираны итгэмжлэгдсэн төлөөлөгчдийн халдлага үргэлжилбэл дахин цохилт өгнө гэдгээ хэлсэн юм.
Сирийн зүүн хэсэгт АНУ-ын агаарын довтолгооны онилсон хоёр объектыг өмнө нь Ираны Исламын хувьсгалт гвардийн корпусын гишүүд болон түүнтэй холбоотой зэвсэгт хүчний бүлгүүд эзэлж байсан гэж цэргийн өндөр албан тушаалтан мэдэгдсэн боловч цохилтын үр дүнд ямар нэгэн хохирол учирсан эсэх нь одоогоор тодорхойгүй байна.
Албаны хүн халдлагын дараа сэтгүүлчдэд мэдээлэл хийх үеэрээ “Тухайн өдөр цохилт өгсөн газарт хүмүүс байсан. Эдгээр газарт байсан хүмүүс бол Ирантай нэгдсэн зэвсэгт хүчний бүлэглэлүүд болон IRGC-ийн ажилтнууд байсан" гэв.
Эх сурвалж: CNN
