/2023.09.25/: Цагдаагийн байгууллагаас 2023 оны есдүгээр сарын 04-нөөс 18-ны өдрүүдэд Хүрээлэн байгаа орчны эсрэг гэмт хэрэг, зөрчлийн шинжтэй дараах үйлдлүүдийг илрүүлжээ.

Үүнд:

1.Хууль бусаар агнаж, тээвэрлэсэн 186 тарвага, 11 ширхэг лаазалсан тарваганы мах Улаанбаатар хот руу нууцаар нэвтрүүлэхийг завдсан,

2.Агнахыг хориглосон зэрлэг амьтан агнасан, тээвэрлэсэн 4 үйлдэл буюу 80 ширхэг ногтруу шувуу тээвэрлэсэн, 1 ширхэг Алтайн хойлог шувуу тус тус тээвэрлэсэн, янгир ямаа агнасан 2 үйлдэл,

3.Зөвшөөрөлгүйгээр элс, хайрга, жонш тээвэрлэсэн 5 үйлдэл буюу 13450 тонн жоншны хүдэр тээвэрлэсэн, зөвшөөрөлгүй элс хайрга, тээвэрлэсэн 4 үйлдэл,

4.Сэтгэцэд нөлөөлөх мансууруулах ургамлын зүйл түүж, тээвэрлэсэн 2 буюу 2 кг каннабисын төрлийн ургамал, Сэтгэцэд нөлөөт мансууруулах бодисын тухай конвенцын 2 дугаар жагсаалтад багтдаг өвс гэх нэршилтэй дельта-9 тетрогидроканнабинол бодис 2 уут тус тус бэлтгэж, тээвэрлэсэн,

5.Хуш модны самар 165 шуудайг хууль бусаар бэлтгэсэн,

6.Хууль бусаар мод бэлтгэсэн 1 буюу 12 ширхэг гуалин мод бэлтгэж, тээвэрлэсэн,

7.Газрын хэвлийд хууль бусаар халдаж хууль бусаар ашигт малтмал олборлосон 2 үйлдэл,

8.Нэн ховор ургамал болох хонин арц 11 шуудайг түүж, бэлтгэн зөөвөрлөсөн 1 үйлдлийг тус тус илрүүлж, эрэн сурвалжлагдаж байсан 2 этгээдийг олж тогтоосон байна.

Тухайлбал:

• Баянхонгор аймгийн Баацагаан сумын нутаг дэвсгэрээс янгир агнах зөвшөөрөлтэй компани зөвшөөрөлд зааснаас өөр газарт АНУ-ын иргэнээр 1 тооны янгир ямаа агнуулсан,
• Архангай аймгаас Тоёота маркийн тээврийн хэрэгслээр Улаанбаатар хот руу 38 ширхэг нойтон тарвага тээвэрлэж нэвтрүүлэхийг завдсан зэрэг үйлдлүүдийг илрүүлэн, мөрдөн шалгах ажиллагаа явуулж байна.