/2023.05.17/: Засгийн газрын өнөөдрийн ээлжит хуралдаанаар төмөр замын асуудлыг хэлэлцэж, баруун босоо төмөр замын эхлэл болох Шивээхүрэн-Сэхэ чиглэлийн төмөр замыг барьж эхлүүлэхээр шийдсэн талаар ЗТХ-ийн сайд С.Бямбацогт мэдээллээ.
Тэрбээр, “Энэ төмөр замаар Нарийнсухайтын бүлэг ордоос экспортолж буй нүүрсийг хил гаргана. Гол төмөр замын нийт урт нь 7 км, салаа төмөр зам нь 20 орчим км байх юм. Хувийн хэвшлийн 200 тэрбум гаруй төгрөгийн хөрөнгө оруулалтаар хэрэгжүүлж, 6 жилийн хугацаанд ашигласны дараа Монголын төмөр зам компанид 100 хувь төлбөргүй шилжүүлж өгөх нөхцөлтэй.
Үүнтэй холбогдуулаад зүүн босоо төмөр зам буюу Арцсуурь-Нарийнсухайт-Шивээхүрэн чиглэлийн 1250 км төмөр зам барих сонгон шалгаруулалт дууссан бөгөөд барилга угсралтыг энэ оны гуравдугаар улиралд багтааж эхлүүлэхээр төлөвлөөд байна. Мөн Гашуунсухайт-Ганцмод чиглэлийн мухар төмөр замын холболтын төмөр замыг барих ТЭЗҮ боловсруулах сонгон шалгаруулалт явуулж, БНХАУ-ын Төмөр замын 2-р товчоо шалгарсан байна. Зураг төслийг нь энэ онд багтаан боловсруулж, БНХАУ-ын төмөр замтай холбох ажил эхлүүлнэ.
Түүнчлэн, зүүн босоо чиглэлийн Хөөт-Бичигт-Зүүнхатавч чиглэлийн 426 км төмөр замын барилга угсралтын ажлыг эхлүүлэх гэрээг зургаадугаар сард хийнэ. Хил холболт, боомтын төмөр зам барих, ОХУ, БНХАУ-ыг холбосон төмөр замуудын ажлыг эхлүүлснээр баруун, зүүн, төвийн гэсэн 3 коридороор ОХУ-ыг Монголоор дамжуулан БНХАУ-тай холбох ажил эрчимтэй явж байгаа гэв.
