/2022.06.13/: Хятадын умард нутгийн Таншан хотод өнгөрөгч баасан гарагт дөрвөн эмэгтэйн биед халдсан хэргээр есөн хүнийг баривчилсан тухай орон нутгийн цагдаа нар мэдэгджээ.

Баасан гарагт болсон үйл явдлын дүр зургийг харуулсан хяналтын камерын бичлэгийг олон нийтийн сүлжээнд нийтэлсэн нь Хятадын иргэдийн дургүйцлийг төрүүлж, Хятад дахь эмэгтэйчүүдийн аюулгүй байдал, эрхийн талаар сошиалд халуухан хэлэлцүүлэг өрнүүллээ.

Эмэгтэйчүүдийг зодож байгааг харуулсан бичлэг нь эмэгтэйчүүдийн аюулгүй байдлын талаар үндэсний хэмжээнд шуугиан тарьсан юм. Бичлэг олон нийтэд цацагдсаны дараа Таншан хотын цагдаа нар баасан гарагийн үдээс хойш мэдэгдэл хийж зарим сэжигтнийг илрүүлсэн бөгөөд үлдсэн хэсгийг нь эрэн сурвалжилж байна гэлээ.

Халдлагад өртсөн хоёр эмэгтэй эмнэлэгт хүргэгдсэн бөгөөд биеийн байдал нь тогтвортой байгаа бол өөр хоёр эмэгтэй хөнгөн гэмтэл авсан байна.

Бямба гарагт орон нутгийн цагдаа нар долоон эрэгтэй болон тэд нартай хамт явсан хоёр эмэгтэйг бүгдийг нь саатуулжээ.

Энэ үйл явдал өнгөрсөн амралтын өдрүүдэд Хятадын олон нийтийн сүлжээгээр ихээхэн яригдаж, тус улсын олон нийтийн дургүйцлийг төрүүлэв. Интернетэд зарим хүмүүс Хятад дахь эмэгтэйчүүдийн аюулгүй байдалд эргэлзэж байгаа бол зарим нь тус улсад эмэгтэйчүүдийн эсрэг хүчирхийллийн талаар хэлэлцэж байна.

Аймгийн эрх баригчид энэ хэргийн эрүүгийн мөрдөн байцаалтыг Хэбэй мужийн Лангфанг руу шилжүүлэх тушаал өгсөн гэж Лангфан хотын цагдаагийн газраас бямба гарагийн орой мэдэгдлээ.