/2021.12.08/: ОХУ-ын Москва хотын Засгийн газраас жил бүр зохион байгуулдаг Дэлхийн хотуудын олон улсын VI олимпиад арванхоёрдугаар сарын 6-13-ны өдрүүдэд болж байна.

Дэлхий даяар тархаад буй коронавирусийн цар тахлын халдварын тархалтаас сэргийлэн, аюулгүй байдлыг хангах зорилгоор тус олимпиадыг танхим, цахим хослуулан зохион байгуулж байгаа. Мөн олон улсын 30 хотын багууд тоо, мэдээлэл зүй, хими болон физик гэсэн дөрвөн төрлөөр өрсөлдөж буй.

Дэлхийн хотуудын олон улсын VI олимпиадад нийслэлийн шилдэг найман сурагч оролцон, мэдлэг, ур чадвараа сорьж байна. Олимпиадын дүн арванхоёрдугаар сарын 13-нд гарна.

Өнгөрсөн жил зохион байгуулагдсан олимпиадад Улаанбаатар хотын баг гуравдугаар байр эзэлсэн юм.

Эх сурвалж: НЗДТГ