/2023.04.03/: Монгол Улсын Ерөнхий сайд Л.Оюун-Эрдэнэ өнөөдөр Уул уурхай, хүнд үйлдвэрийн сайд Ж.Ганбаатар тэргүүтэй салбарын төлөөллүүдийг хүлээн авч уулзлаа.
Уулзалтаар “Шинэ сэргэлтийн бодлого”-д тусгагдсан аж үйлдвэржилтийн сэргэлт, боомтын сэргэлтийн хэрэгжилтийн явцыг танилцуулж, тулгамдсан асуудлуудыг сонсож, цаашид авах арга хэмжээний талаар хэлэлцүүлэг өрнүүллээ.
Мөн төр, хувийн хэвшлийн түншлэлийн хүрээнд ашигт малтмалын салбарыг түшиглэсэн эдийн засгийн тогтвортой, хэвийн үйл ажиллагааг хангах, хариуцлагатай уул уурхайг бэхжүүлэх асуудлаар санал солилцлоо.
Салбарын мэргэжилтнүүдийн зүгээс төрийн хүнд суртлыг арилгах, АМНАТ-ийг тооцох аргачлалыг боловсронгуй болгох, энэ хүрээнд хуулийн шинэчлэл хийгдэж буйд талархалтай байгааг илэрхийлээд байгаль орчинд ээлтэй техник технологийн дэвшлийг нэвтрүүлсэн аж ахуй нэгжүүдэд тусгай зөвшөөрөл олгох нь хариуцлагатай уул уурхайн үндэс суурь болно гэдгийг онцлов.
Мөн энэ салбарт тулгамдаж буй 6 асуудлыг нэрлэлээ.
Түүнчлэн тогтвортой үйлдвэрлэлийг хөгжүүлэх, уул уурхайн үйлдвэрлэлийн зардлын 20 орчим хувийг бүрдүүлдэг тэсэлгээний материалын түүхий эдийг эх орондоо үйлдвэрлэхэд, хүний нөөцийн асуудалд анхаарах, хариуцлагын тогтолцоог сайжруулах, ач холбогдол өндөр төслүүдэд татварын хөнгөлөлт үзүүлэх, орон нутгийн иргэдийн эсэргүүцэл, хуулиас давсан дүрэм, журмыг цэгцлэх саналыг тавьж, асуудлын гарц шийдэлд хамтран гаргалгаа гаргаж, дэмжин ажиллахаа илэрхийллээ.
Эх сурвалж: ЗГ
