/2022.11.22/: Индонезийн Баруун Ява мужид болсон 5.6 баллын хүчтэй газар хөдлөлтийн улмаас амиа алдагсдын тоо 162-д хүрсэн тухай амбан захирагч мэдэгдлээ.
Мөн 326 хүн ямар нэгэн байдлаар шархадсан гэж захирагч Ридван Камил хэвлэлийн бага хурал дээр мэдэгдэв.
АНУ-ын Геологийн албаны (USGS) мэдээлснээр газар хөдлөлт даваа гарагт Баруун Ява арлын Цианжур мужид 10 километрийн гүнд болсон байна.
Газар хөдлөлтийн улмаас 13,782 хүн дүрвэсэн бөгөөд дүрвэгсэд 14 хуаранд хуваагдан байрлаж байна. Гамшгийн улмаас 2345 байшин эвдэрсэн байна.
Дөрвөн сургууль, 52 байшин нурж, их хэмжээний хохирол учирсан гэж Онцгой байдлын ерөнхий газрын (BNPB) орон нутгийн албанаас мэдээллээ. Тус агентлагийн мэдээлснээр сүм болон эмнэлэг мөн эвдэрсэн байна.
Газар хөдлөлт болсон газарт ажиллаж буй Засгийн газрын төлөөлөгч Херман Сухерман хэвлэл мэдээллийнхэнд хэлэхдээ, зарим оршин суугчид нурсан барилгуудын дор дарагдсан байна гэв. Мэдээллийн суваг Metro TV-ээр олон зуун хохирогч эмнэлгийн зогсоол дээр эмчлүүлж байгааг харуулсан байна.
Телевизийн бичлэгт оршин суугчид бараг бүхэлдээ нуранги болж хувирсан барилгуудын гадаа бөөгнөрсөн байхыг харуулсан гэж Ройтерс агентлаг мэдээлэв.
Газар хөдлөлтөөс хойш хоёр цагийн дотор 25 удаа чичирхийлэл бүртгэгдсэн тул хөрсний гулгалт, ялангуяа аадар бороо орох аюултайг BMKG анхааруулж байна.
Амбан захирагч Камил өмнөх хэвлэлийн бага хурал дээр хэлэхдээ, "Амь үрэгдэгсдийн тоо цаашид нэмэгдэх хандлагатай байна. Осол гарсан газарт хүмүүс барилгын нурангид дарагдсан хэвээр байгаа тул шархадсан болон амь үрэгдэгсдийн тоо цаг хугацааны явцад нэмэгдсээр байх болно гэж бид таамаглаж байна" гэж мэдэгдэв.
"Аврагчид одоогоор дарагдсан хүмүүсийн заримд хүрч чадахгүй байгаа бөгөөд нөхцөл байдал эмх замбараагүй хэвээр байна. Цаашид дахин чичирхийлэл үүсч болзошгүй" гэв.
Засгийн газрын эрх баригчид одоогоор хохирогчдод зориулж майхан, хоргодох байр барьж, тэдний үндсэн хэрэгцээг хангаж байна гэж Камил нэмж хэлэв.
Индонез улс нь Номхон далайг тойрсон "Галын цагираг"-д байрладаг бөгөөд байнга газар хөдлөлт, галт уулын идэвхжил бий болдог манай гаригийн хамгийн идэвхжил өндөртэй бүс юм.
Эх сурвалж: CNN
