/2022.08.23/: Ардчилсан тогтолцооны амин тулгуур болох иргэний нийгмийг хаах, хумих зэрэг ардчиллын ухралт дэлхийн олон улс оронд үзэгдэж байгаа цаг үед Монгол Улсад ч иргэний орон зайг хумих эрсдэл бүхий холбоо, сангийн эрх зүйн байдлын тухай хуулийн төслүүдийг батлах асуудал яригдаж буй энэ цаг үед Иргэний нийгмийн консорциумын зүгээс “Иргэний орон зайг хамгаалах нь” хагас өдрийн хурлыг 2022 оны 08-р сарын 29-ний өдөр иргэний нийгмийн байгууллагуудын хамт зохион байгуулна.

Уг хурлын зорилго нь иргэний нийгэм, эрдэмтэн судлаач, хэвлэл мэдээллийн төлөөллийн иргэний орон зайг хамгаалах талаарх олон ургальч дуу хоолойг шийдвэр гаргагчдад хүргэж, олон нийтийг мэдээлжүүлэх юм. Монгол Улсад нээлттэй иргэний орон зай яагаад чухал болох, уг орон зайг хадгалахын учир шалтгаан, иргэний нийгмийн ардчилалд үзүүлдэг ач холбогдол, ФАТФ-ын зөвлөмжийн тухай буруу ойлголтыг хэрхэн залруулах, нээлттэй иргэний орон зайд хэвлэл мэдээлэл ямар үүрэгтэй болох, хэвлэлийн эрх чөлөө, судалгаанд суурилж салбарын төлөөллийг оролцуулсан хамтын бодлого боловсруулалт зэрэг асуудлыг хурлаар хөндөнө.

Иргэний орон зайг нээлттэй байлгаж, иргэний нийгмийг хөгжүүлэх төрийн бодлого дутаж буй Монгол Улсад цаг үеэ олсон уг чухал хуралд Таныг идэвхтэй оролцохыг урьж байна.