Н.Учрал яагаад гэнэт С.Амарсайханыг онилов?

Ерөнхий сайд Н.Учралын Засгийн газар доторх улс төрийн зөрчил ил гарч эхэллээ.
МАН-ын доторх “30-ын бүлэг”-ээс Засгийн газарт орсон таван сайдын нэг нь Хууль зүй, дотоод хэргийн сайд С.Амарсайхан. Харин сүүлийн өдрүүдэд Н.Учрал кабинетынхаа зарим гишүүдийг өөрийнх нь эсрэг ажилласан байж болзошгүй хэмээн шалгуулах тухай мэдэгдсэн нь улс төрийн хүрээнд анхаарал татаж байна.

Тэгвэл энэ улс төрийн мөргөлдөөн яг одоо яагаад хурцдав?

Учир нь Ерөнхий сайдын гэр бүлийн хамаарал бүхий сургуульд улсын төсвөөс 3.5 тэрбум төгрөгийн санхүүжилт тусгасан гэх асуудал хэдхэн хоногийн дотор улс төрийн том дуулиан боллоо.

Н.Учрал “манай гэр бүлийн хамаарал бүхий сургууль ямар нэгэн хүсэлт гаргаагүй” хэмээн үгүйсгэсэн. Харин Боловсролын яамны Төрийн нарийн бичгийн даргын өмнөх болон дараагийн тайлбарууд зөрсөн гэх асуудал ч гарч ирэв. Боловсролын сайд Л.Энх-Амгалан харин “хувийн сургуульд санхүүжилт олгох, тоног төхөөрөмж өгөх жагсаалт батлагдаагүй” гэж мэдэгдсэн байна. Ийм үед улс төрийн анхаарлыг өөр тийш нь эргүүлэх оролдлого явагдаж байна уу гэсэн асуулт өөрөө гарч ирнэ.

Удган Булнай гэгч яагаад гэнэт улс төрийн том сэдэв болов?

Удган Б.Булнайгийн цахим хаягт төрийн өндөр албан тушаалтантай холбоотой маш ноцтой агуулгатай мэдэгдэл өмнө нь гарч байсан нь харагдана. Тухайлбал, төрийн албан тушаалтныг дагавар охинтойгоо хайр сэтгэлийн холбоотой байсан гэх агуулгатай пост нийтлэгдсэн байна. Гэхдээ энэ нь удганы цахим хаяг дахь баталгаажаагүй мэдэгдэл бөгөөд тухайн агуулгыг нотолсон баримт одоогоор илрээгүй.
Тэгвэл ийм мэдээлэл дахин улс төрийн анхаарлын төвд орж ирэхэд хэн хожих вэ?
Хэн хэндээ хэрэгтэй мэдээллийг яг хэрэгтэй цагт гаргаж ирдэг улс төрийн технологи Монголд шинэ зүйл биш.

Н.Учрал, С.Амарсайхан нарын жинхэнэ зөрчил нь юу вэ?

С.Амарсайхан бол МАН-ын “30”-ын бүлгийн төлөөлөл. Тэр Булган аймагт 30 гаруй гишүүн уулзсан гэх мэдээллийн дараа “хэн нэгнийг огцруулах талаар яриагүй” гэж тайлбарласан.
Гэтэл үүний дараах улс төрийн өрнөлд Ерөнхий сайдын кабинетын доторх үл ойлголцол илүү тод харагдах болов.

Н.Учрал үнэхээр С.Амарсайханыг улс төрийн гол өрсөлдөгч гэж харж эхэлсэн үү?

Эсвэл “30-ын бүлэг” Засгийн газрын тодорхой шийдвэрүүд дээр Ерөнхий сайдыг дангаар нь хамгаалах сонирхолгүй болчихов уу?
Хэрэв тийм бол Н.Учралын өнөөдрийн улс төрийн довтолгоо зөвхөн нэг сайд руу чиглэсэн хэрэг биш байж мэднэ.

Хамгийн сонирхолтой нь цаг хугацаа

Нэг талд, Ерөнхий сайдын ээжийн нэр дээрх сургуультай холбоотой 3.5 тэрбумын асуудал.
Нөгөө талд, Боловсролын яамны тайлбаруудын зөрүү.
Гурав дахь талд, Ерөнхий сайдын “улс төржилт”, кабинет дотроос өөрийнх нь эсрэг ажилласан байж болзошгүй хүмүүсийг шалгуулах тухай мэдэгдэл.
Дөрөв дэх талд, С.Амарсайхан болон “30-ын бүлэг”.
Тав дахь талд, цахим орчинд тархсан, нотлогдоогүй ноцтой мэдээллүүд. Энэ бүх үйл явдал нэгэн зэрэг давхцаж байгаа нь өөрөө улс төрийн сонирхолтой зураглал.

Гэхдээ энд нэг асуулт хамгийн чанга сонсогдоно.
Ерөнхий сайдын гэр бүлийн нэр холбогдсон 3.5 тэрбумын асуудлыг дарах шаардлага үнэхээр хэнд байна вэ?
Олон нийтийн анхаарлыг төсвийн мөнгө, ашиг сонирхлын зөрчлийн асуудлаас өөр сэдэв рүү шилжүүлэх улс төрийн технологи ашиглагдаж байна уу?
Эсвэл үнэхээр Засгийн газар доторх “30-ын бүлэг” Н.Учралтай жийлцэж эхлэв үү?

Өнөөдрийн байдлаар эдгээр асуултын аль нэгэнд нь шууд “тийм” гэж хариулах баримт хангалтгүй. Харин нэг зүйл тодорхой.
3.5 тэрбумын асуудал бол зүгээр нэг төсвийн тоо биш. Харин эрх мэдэл, ашиг сонирхол, Засгийн газар доторх улс төрийн тэнцвэрийн шалгалт болж хувирч байна.
Тиймээс сенсаци хаашаа эргэхээс илүүтэй мөнгө хаашаа орох гэж байсан, хэн шийдвэр гаргасан, ямар шалгуураар тухайн сургуулийг сонгосон, Ерөнхий сайд энэ шийдвэрт ямар нэгэн байдлаар оролцсон эсэх нь л гол асуудал.

Харин энэ асуултаас олон нийтийн анхаарлыг өөр зүйл рүү эргүүлэх гэж байгаа бол "Сенсациар сенсацийг дарах” улс төрийн технологи ажиллаж эхэлсэн үү?