/2023.11.30/: Гайхамшигт материал гэж нэрлэдэг графен хэмээх материал нь хүний үснээс нэг сая дахин нимгэн хэдий ч ган төмрөөс илүү бат бөх байдаг.
Газрын гүнээс олборлосон графитын нэг давхаргаар хийсэн хоёр хэмжээст нүүрстөрөгчийн энэхүү материал нь маш хөнгөн, уян хатан чанартай бөгөөд цахилгаан дамжуулахаас эхлээд тээвэр хүртэлх бүхий л салбарт хувирах технологийг бүтээх боломжтой юм.
Одоо Арабын Нэгдсэн Эмират улсын (АНЭУ) Халифа их сургуулийн судлаачид графены өөр нэг хэрэглээ болох ундны ус үйлдвэрлэх талаар судалж байгаа аж.
"Арабын Нэгдсэн Эмират улсын ундны ус бүхэлдээ давсгүйжүүлсэн ус буюу цэвэршүүлсэн ус байдаг учраас энэ нь эдийн засаг төдийгүй нийгэмд маш чухал салбар юм" гэж тус их сургуулийн Графен болон 2D судалгааны судалгаа, инновацийн төвийн ахлах захирал Хассан Арафат хэлэв.
Давсгүйжүүлсэн ус гэдэг нь далайн усыг давсгүйжүүлэн цэвэршүүлж унданд хэрэглэхэд тохиромжтой болгосон ус юм. Гэхдээ давсгүйжүүлэх нь зардал ихтэй, эрчим хүч их шаарддаг процесс юм.
Дэлхийн хэмжээнд 300 сая гаруй хүн давсгүйжүүлсэн ус буюу цэвэршүүлсэн ус хэрэглэдэг. Мөн уур амьсгалын өөрчлөлт, бохирдол нь бидний хязгаарлагдмал цэвэр усны нөөцөд заналхийлж байгаа тул энэ тоо нэмэгдэх болно.
Арафат хэлэхдээ графен нь шүүлтүүрийн материал нь нянгаас шалтгаалж бохирддог бөгөөд энэхүү шинэ материалыг шүүлтүүрт ашигласнаар уг асуудлыг шийдвэрлэж чадах аж. Шүүлтүүрийн "ажиллагааг сайжруулах" зорилгоор графен ашиглах нь эрчим хүчний хэрэглээг бууруулж, давсгүйжүүлэх зардлыг бууруулахад тусална гэж найдаж байгаагаа Арафат хэллээ.
Эх сурвалж: Aljazeera
