/2023.10.04/: Пакистаны зүүн хэсгийн цагдаа нар баян чинээлэг хүмүүст зориулан олон зуун өвчтөний бөөрийг мэс заслын аргаар авсан найман хүнийг баривчилжээ.
"Доктор Фавад" гэгддэг гэмт бүлэглэлийн толгойлогч нь хүмүүсийн бөөрийг авахын тулд 328 удаа мэс засал хийж, тус бүрийг нь 10 сая пакистан рупи буюу 34,000 доллараар үйлчлүүлэгчдэд худалдсан хэрэгт буруутгагдаж байна гэж Пакистаны Ерөнхий сайд Мохсин Накви мэдэгдэв.
Ерөнхий сайд хэлэхдээ, гэмт бүлэглэлүүд эмнэлгүүдээс өвчтөнүүдийг ятгаж, Таксила, Лахор хот болон Кашмир мужид хагалгааг хийсэн байна.
Ерөнхий сайдын хэлснээр уг явдлын улмаас одоогоор гурван хүн нас барсан нь батлагдсан байгаа ч өшөө олон хохирогч байх ёстой хэмээн таамаглаж байгаа аж.
Бүлгийн толгойлогч Фавад өмнө нь таван удаа баривчлагдаж байсан ч тухай бүртээ суллагдаж байсан бөгөөд ингэснээр гэмт хэргээ цааш үргэлжлүүлж байжээ.
Эрхтэнүүдийг нь авсан өвчтөнүүдийн зарим нь бөөрийг нь авсныг мэдээгүй байна.
Тэд өвчтөнүүдэд хувиараа эмчлүүл хэмээн ятгаж тэднийг мэс засалд оруулан нэг бөөрийг нь нууцаар авдаг байжээ.
Тус улс одоо бөөр шилжүүлэн суулгуулах болон донор хайх, донортой холбоотой заруудыг хориглохоор хуулиа батлуулах гэж байна.
Пакистан улс 2007 онд хүний эд эрхтнийг худалдаалахыг хууль бус болгож, 2010 онд чангатгасан хууль гаргаснаар эд эрхтнийг хурааж, худалдсан тохиолдолд 10 жил шоронд хорих, 1 сая рупи буюу 3400 ам.долларын торгууль ногдуулдаг болжээ.
Хууль гарахаас өмнө тус улс нь эрхтэн шилжүүлэн суулгах мэс засал хайсан гадаадын болон чинээлэг пакистанчуудын эд эрхтний наймааны төв байсан бөгөөд бөөр худалдаж авах, худалдах нь ердийн заншил байсан тул зарим ядуу пакистанчууд амьд үлдэхийн тулд бөөрөө зардаг байв.
Эх сурвалж: CNN
