/2023.09.11/: Марокко улсад баасан гарагт болсон газар хөдлөлтийн улмаас нурангид дарагдсан хүмүүсийг аврахын тулд онцгой байдлын албаныхан цаг хугацаатай уралдаж, алслагдсан бүс нутагт тусламж хүргэхээр тэмцэж байна.
Тосгоны оршин суугчид амьд үлдсэн хүмүүсийг олохын тулд гар болон хүрзээр хайсаар байгаа тул хариу арга хэмжээ авах багууд машин техник авчрахаар тэмцэж байна.
Хүмүүс өлсөж, хүүхдүүд усгүй цангаж, тэдэнд тусламж хэрэгтэй байгаа талаар гамшигт өртсөн бүсэд байгаа нэгэн эмэгтэй ВВС агентлагт ярьжээ.
Баасан гарагт болсон газар хөдлөлт нь тус улсад сүүлийн 60 гаруй жилийн хугацаанд хамгийн их хохирол учруулсан газар хөдлөлт болсон бөгөөд Марракешээс өмнө зүгт орших уулархаг тосгоны дор газар хөдлөлт болжээ.
Засгийн газар 2,122 хүн нас барж, 2,421 гаруй хүн гэмтэж бэртсэний олонх нь хүнд байгаа гэж мэдээлсэн байна.
ЮНЕСКО-гийн Дэлхийн өвд бүртгэгдсэн Марракеш хотын түүхэн дурсгалт хэсэг сүйрчээ.
Хамгийн их хохирол амссан бүс нутгуудын зарим нь маш алслагдсан байсан тул газар хөдлөлтийн дараах хэдэн цагийн дотор тэдэнд хүрэх боломжгүй байсан нь шархадсан хүмүүсийн хувьд хамгийн хүнд үе байжээ.
Газар хөдлөлтийн улмаас унасан чулуулгууд нь угаас муухан байсан Өндөр Атлас уулс руу чиглэсэн замуудыг хэсэгчлэн хааж, хамгийн их нэрвэгдсэн газрууд руу очих аргагүй болгосон байна.
Марракешээс өмнө зүгт 55 км зайд орших уулсын хөндийд орших Амизмиз хэмээх жижиг хотод олон барилга нуранги болсон байна.
Орон нутгийн эмнэлэг хоосон байгаа бөгөөд нурах аюултай гэж үзжээ. Харин өвчтөнүүдийг эмнэлгийн талбайд майханд эмчилж байгаа боловч ачаалал маш их байгаа аж.
Нэрээ хэлэхийг хүсээгүй эмнэлгийн ажилтан бямба гарагт 100 орчим цогцос авчирсан гэж мэдэгдэв.
“Олон хүн нас барсан, ялангуяа бага насны хүүхдүүд байна. Газар хөдлөлтөөс хойш би унтаагүй. Бидний хэн нь ч унтаагүй" гэж тэрээр ярьжээ.
Бусад улсууд тусламж илгээхийг хүсэж байгаа хэдий ч тус улсаас албан ёсны тусламж гуйсан хүсэлт ирээгүй байгаа тул Франц, АНУ зэрэг улсууд хүлээсээр байгаа бол Испани, Катар улсууд албан ёсны хүсэлт хүлээн авч, эрэн хайх, аврах баг илгээнэ гэдгээ мэдэгдээд байна.
Эх сурвалж: ВВС
