/2022.01.06/: Филадельфийн нийтийн орон сууцны байшинд утаа мэдрэгч ажиллахаа больсны улмаас сүүлийн жилүүдэд гарсан хамгийн том галын нэг болж, дор хаяж 13 хүн, тэр дундаа долоон хүүхэд амь үрэгджээ.

Гал сөнөөгчид өглөөний 06:40 (GMT 1140) орчимд ирж, хотын Фэйрмунт хорооллын гурван давхар байшингийн хоёр давхарт гарсан галыг унтраахаар 50 минут орчим тэмцсэн байна.

Энэхүү барилга нь холбооны санхүүжилттэй Филадельфийн орон сууцны удирдах газрын мэдэлд байдаг аж. Найман хүн хоёр гарцын нэгээр дамжин барилгаас гарч чадсан бөгөөд амь үрэгдэгсдийн дунд долоон хүүхэд байсан гэж Галын комиссын нэгдүгээр орлогч Крейг Мерфи хэвлэлийн бага хурал дээр сэтгүүлчдэд мэдэгдэв. Албаныхан хүүхдүүдийн насыг заагаагүй байна.

Гал түймрийн албаныхан амиа алдагсдын тоо өөрчлөгдөж магадгүй гэсэн бөгөөд галын шалтгааныг үргэлжлүүлэн шалгаж байгаа тухай мэдэгдэв.

Мерфи сэтгүүлчдэд "Энэ аймшигтай гал байсан. Би одоо 35 жил ажиллаж байгаа бөгөөд энэ бол миний өмнө харж байсанаас хамгийн аймшигтай галын нэг байлаа" гэж хэлжээ.

Нэг хүүхэд, нэг том хүнийг түргэний эмч нар ойролцоох эмнэлэгт хүргэжээ. Тус барилгад дөрвөн утаа мэдрэгч байсан ч бүгд ажиллаагүй гэж гал унтраах албаныхан мэдэгдэв.

Утаа мэдрэгчийг хамгийн сүүлд хэзээ шалгасан талаар ташаа, зөрчилтэй мэдээ байна. Гал түймэртэй тэмцэх газраас тэднийг хамгийн сүүлд 2020 онд шалгасан гэж мэдэгдэв. Филадельфигийн орон сууцны албаны гүйцэтгэх дэд ерөнхийлөгч Динеш Индала сэтгүүлчдэд хэлэхдээ, хамгийн сүүлд 2021 оны тавдугаар сард шалгалт хийсэн хэмээжээ.

Тэрбээр тавдугаар сард хийсэн шалгалтын үеэр батарейгаар ажилладаг детектор дөрөв биш зургаан ширхэг ажиллаж байсан гэсэн ч илрүүлэгч яагаад ажилаагүй мэдэхгүй байна гэж хэлжээ.

Уг барилгыг хоёр айлын орон сууц болгон өөрчилсөн гэж Индала хэлсэн бөгөөд уг барилгад 26 хүн амьдардаг байжээ.

Эх сурвалж: voanews