/2021.11.15/: Халдварт өвчин судлалын үндэсний төв нь өнгөрсөн баасан гарагт Шинжлэх ухаан, технологийн их сургуультай /ШУТИС/ хамтран ажиллах санамж бичгийг байгууллаа.

Талууд хамтын ажиллагааны дараах үндсэн чиглэлүүдээр ажиллахаар тохиролцож гарын үсэг зурав.

Үүнд:

• Судалгаа шинжилгээний ажил, төсөл хөтөлбөр, арга хэмжээг хамтран хэрэгжүүлэх,

• Харилцан ашигтай хамтын ажиллагааг дэмжин, талуудын үндсэн үйл ажиллагааны чиглэлээр хамтарсан сургалт зохион байгуулах,

• ШУТИС-ын эрдэмтдийн судалгааны ажлыг үр дүнд бий болсон эрдмийн бүтээлийг үйлчилгээнд турших, хөгжүүлэхэд бодлогоор ХӨСҮТ-ийн зүгээс дэмжин ажиллах,

• ХӨСҮТ-ийн ажил үүргийн хүрээнд халдварт өвчний тандалт, хариу арга хэмжээ, эмчилгээ тусламж үйлчилгээний чиглэлээр ШУТИС-ын багш, оюутнуудад дэмжлэг үзүүлж ажиллана.

Энэ үеэр ШУТИС-ийн захирал Б.Очирбат "Цар тахлын хүнд хэцүү цагт ачааны хүндийг нэр төртэй үүрч ажиллаж байгаа ХӨСҮТ-ийн цаашдын ажилд нь бид хамтран ажиллах болсондоо баяртай байна. Манай сургуулийг төгссөн олон ч мэргэжилтнүүд танай байгууллагад ажилладаг. Цаашид бид хамтын ажиллагааг улам өргөжүүлэх тал дээр анхаарч ажиллана” гэв.

ХӨСҮТ-ийн Дэд захирал Ц.Чинбаяр дотоод хамтын ажиллагааг дэмжин хамтран ажиллаж буй ШУТИС-ийн удирдлагуудад талархал илэрхийлсэн бол Дэд захирал Ж.Байгалмаа ШУТИС-ийн Эмчилгээний хоол зүй, тандалт судалгааны мэдээлэл боловсруулах чиглэлд хамтран ажиллах хүсэлтэй байгаагаа илэрхийлж хамтын ажиллагааны үр дүнд маш том өөрчлөлт хийх боломжтой гэж харж байна хэмээлээ.

Эх сурвалж: ХӨСҮТ