/2021.10.27/ Хорих 461 дүгээр ангид 20 дахь хоног дээрээ өлсгөлөн зарлаж буй Э.Одбаярын биеийн байдал тааруу, бөөрний дутагдалд орсон талаар mpress.mn сайт өчигдөр мэдээлсэн билээ.

Тэрбээр, өөрийг нь хийгээгүй хэрэгт холбогдуулан шалгаж байгааг эсэргүүцэж байгаа юм. Мөн өмгөөлөгчгүйгээр байцааж, цагдан хорьж байгаа хуулийн ялгамжтай байдлыг эсэргүүцэж ийнхүү өлсгөлөн зарлаж байна.

No Double Standard хөдөлгөөний зохицуулагч Э.Одбаярыг Эрүүгийн хуулийн 23.1 буюу Хууль сахиулагчийн тавьсан шаардлагыг хүч хэрэглэн эсэргүүцсэн. Бусдын нэр хүндэд халдсан, гутаасан гэсэн хоёр зүйл заалтаар буруутгаж байгаа аж.

Бусдын нэр төрийг гутаасан хэрэгт дээд тал нь 3 сар баривчлах ял оногдуулдаг. Харин Хууль сахиулагчийн тавьсан шаардлагыг хүч хэрэглэн эсэргүүцсэн хэрэгт 3 жил хорих юм уу 2 сая 700 мянган төгрөгөөр торгох хүртэлх хэмжээний арга хэмжээ авдаг байна.