АНУ-ын Ерөнхийлөгч Дональд Трамп Хэллоуины баяраар Цагаан ордонд зохион байгуулсан хүүхдүүдэд зориулсан арга хэмжээний үеэр Air Force One онгоцыг Цагаан ордны дээгүүр хоёр удаа нам өндөрт нисгэжээ. Гэвч баярын үзүүлбэр болгон зохион байгуулсан уг нислэг Вашингтон хотын оршин суугчдыг сандаргаж, нисэхийн хөдөлгөөнд саад учруулсан байна.

Аравдугаар сарын 29-ний пүрэв гарагийн орой болсон арга хэмжээний үеэр Трамп болон тэргүүн хатагтай Меланиа Трамп хүүхдүүдэд чихэр тарааж байх үед ерөнхийлөгчийн онгоц Цагаан ордны дээгүүр ниссэн байна. Цагаан ордон уг нислэгийг хүүхдүүдэд зориулсан “гайхалтай Air Force One нислэг” хэмээн цахим хуудсандаа дүрсэлжээ.

Гэвч онгоц Вашингтоны дээгүүр ердийнхөөс нам өндөрт ниссэн нь зарим оршин суугчийг айдаст автуулсан байна. The Washington Post-ын мэдээлснээр онгоц зарим хэсэгтээ газрын түвшнээс 400–1,000 фут буюу ойролцоогоор 122–305 метрийн өндөрт нисжээ. Зарим иргэн онгоц осолдох гэж байна хэмээн болгоомжилж, яаралтай тусламжийн 911 дугаарт хүртэл дуудлага өгсөн талаар мэдээлсэн байна.

Нислэгийн улмаас АНУ-ын Холбооны Нисэхийн Захиргаа (FAA) ойролцоох Рональд Рейганы нэрэмжит Вашингтоны үндэсний нисэх онгоцны буудлын хөдөлгөөнийг түр хугацаанд зогсоожээ. FlightAware нислэг хянах үйлчилгээний мэдээллээр тухайн өдөр нийт 202 нислэг саатсан бөгөөд хөөрөх нислэгийн 26 хувь, буух нислэгийн 17 хувь нь сааталд өртсөн байна.

Үүнээс гадна Колумбын тойргийн хотын зөвлөл нислэгийн талаар урьдчилан хангалттай мэдээлэл өгөөгүйд шүүмжлэлтэй ханджээ. Тэдний мэдэгдсэнээр Вашингтон хотын төв, Пентагон болон нисэх буудалд ердөө 15 минутын өмнө анхааруулга хүргэсэн бөгөөд энэ нь олон хүнийг цочроосон байна. Харин агаарын тээврийн компанийн албаныхан нислэгийн талаар нэг цаг хүрэхгүй хугацааны өмнө мэдэгдэл авсан гэжээ.

FAA нислэгийг тус агентлагтай урьдчилан зохицуулсан гэж мэдээлсэн ч мэдэгдлийг яг хэзээ хүргүүлсэн талаар тодорхой тайлбар өгөөгүй байна.

Сонирхуулахад, АНУ-ын ерөнхийлөгчийг тээвэрлэж яваа үед тухайн онгоц Air Force One гэсэн дуудлагын нэр ашигладаг. Трамп өмнө нь өөрийн оролцож буй томоохон спортын арга хэмжээний үеэр ч ерөнхийлөгчийн онгоцоор нислэгийн үзүүлбэр хийлгэж байсан удаатай.