Лиман орчимд Украины хүчнүүд Оросын цэргүүдийг бүслэн, 51-р армийн командлалыг цохисон гэж мэдэгдэв. Украины Батлан хамгаалах хүчин Лиман хотын ойролцоо Оросын 500 орчим цэргийг “тогоонд” хааж, бүх ухрах замыг тасалсан гэж Украины талаас мэдээлжээ.

Мөн Донецк хотод байрлах Оросын 51-р нэгдсэн зэвсэгт армийн командлалын штабыг нарийвчилсан цохилтоор устгаж, командлагч болон орлогчдыг нь устгасан гэж тус мэдээнд дурджээ.

Украины Зэвсэгт хүчний Жанжин штаб 8 дугаар сарын 26-27-ны өдрүүдэд Донецк орчимд Оросын үндсэн болон нөөц командлалын штабуудыг агаараас хөөргөсөн пуужингаар цохисон гэж албан ёсоор баталсан. Зарим эх сурвалж нэг цохилтын бай нь 51-р армийн штабтай холбоотой гэж үзэж байгаа ч командлалын бүрэлдэхүүний хохирлын талаарх дэлгэрэнгүй мэдээлэл хараахан батлагдаагүй байна.

Газрын зураг болон бие даасан ажиглагчдын мэдээллээр Украины цэргүүд Лиманы хойд хэсэгт, Нитриус голын дагуу Оросын цухуйсан байрлалд дарамт үзүүлж, эсрэг довтолгоо хийж байна. Энэ нь Оросын байрлалыг шахаж буй үйл явц бөгөөд бүрэн бүслэлт хийгдсэн гэх мэдээлэл одоогоор бүрэн батлагдаагүй. Зарим шинжээчид хоёр Оросын хороо бүслэлтэд орох эрсдэлтэй гэж үзэж байгаа ч ухрах боломж хараахан хаагдаагүй гэж тэмдэглэжээ.

Одоогоор тулааны талбар дахь нөхцөл байдал хурдацтай өөрчлөгдөж байгаа тул цаашдын мэдээллийг хүлээх шаардлагатай.

Эх сурвалж: euromaidanpress.com

Т.Бат