/2021.12.09/ Хөдөлмөрийн тухай хуулийг шинэчлэн найруулж, 2022 оны нэгдүгээр сарын 1-нээс мөрдөж эхлэх юм. Энэхүү хуулийг өнгөрсөн долдугаар сарын 2-нд баталсан.

Шинэчилсэн найруулгад орсон өөрчлөлтийг дурдвал:

1. Хөдөлмөр эрхлэлтийн харилцаанд анх орсон болон ажил хөдөлмөр эрхэлж байгаа ажилтнаас бичиг баримт /иргэний үнэмлэх, боловсролын бичиг баримт, эд зүйл, мөнгө/ ажил олгогч эх хувиар нь барьцаалж авахыг хориглосон.
2. Ажил эрхлэлт, хөдөлмөрийн харилцаанд дарамт, хүчирхийлэл, ажлын байрны бэлгийн дарамтаас урьдчилан сэргийлэх, таслан зогсоох, гарсан гомдлыг шийдвэрлэхээр тусгасан.
3. Хөдөлмөрийн тухай хуульд анх удаа хууль тогтоомжийн эрэмбэ тогтоож, хамтын гэрээ, хөдөлмөрийн гэрээ, хөдөлмөрийн дотоод хэм хэмжээ нь хууль тогтоомжийн бүрэлдэхүүнд орж, ажилтны хувьд сайжирсан зохицуулалтыг дагаж мөрдөхөөр заасан.
4. Ажил олгогч ажлын уян хатан бодлого хэрэгжүүлэх замаар ажилтны хүүхдэд ээлтэй, хүүхэд хамгааллын бодлого хэрэгжүүлэхээр заасан.
5. Ажилтныг долоо хоногт 56 цагаас илүү цагаар ажиллуулахыг хязгаарласан.
6. Шөнийн цагаар ажилласан ажилтанд 1.2 хувиар нэмэгдүүлж цалин олгохоор заасан.
7. Анх ажилд орсон ажилтны ээлжийн амралт ажиллаж эхэлснээс хойш зургаан сарын дараа үүсэхээр заасан.
8. Хүүхэд нь шинээр төрсөн эцэгт ажлын 10-аас дээш өдрийн дундаж цалин хөлстэй тэнцэх олговортой чөлөө олгохоор болсон байна.

Хуулийн бүрэн эхийг унших бол ЭНД дарна уу.

Эх сурвалж: Хөдөлмөр нийгмийн хамгааллын яам