/2021.12.08/: Орос Украинд “түрэмгийлсэн” тохиолдолд хориг арга хэмжээ авах нь Москваг дэлхийн санхүүгийн системээс бүрэн тусгаарласантай адил юм.
Энэ тухай мягмар гарагт АНУ-ын Улс төрийн асуудал эрхэлсэн Төрийн нарийн бичгийн дарга Виктория Нуланд АНУ-ын Конгрессын Гадаад харилцааны хорооны сонсголын үеэр мэдэгдэв.
"Бидний ярьж байгаа зүйл нь ОХУ-ыг дэлхийн санхүүгийн системээс бүрэн тусгаарлахтай адил бөгөөд энэ нь Оросын бизнес эрхлэгчид, ОХУ-ын оршин суугчдад ажил, аялал, худалдаа хийх боломжийг олгох бүх эрх хаагдах муу үр дагаварт хүргэх болно" гэж тэр мэдэгдэв.
Нуланд хэлэхдээ, АНУ-ын эрх баригчид ОХУ-тай бүх түвшинд харилцаж, Украин болон бусад улстай тулгарсан асуудлыг дипломат аргаар шийдвэрлэхийг шаардаж байна гээд Сенатын Гадаад харилцааны хорооны сонсголын нээлтийн үеэр хэлсэн үгэндээ "Бид ОХУ-тай бүх түвшинд харилцаж, Украин болон транс атлантын нийгэмлэгтэй холбоотой аливаа асуудлыг дипломат арга замаар шийдвэрлэхийг Москвад уриалж байна" гэжээ.
АНУ болон түүний холбоотнууд ОХУ-ыг хурцадмал байдлыг намжааж, Орос-Украины хилээс цэргээ татаж, хэлэлцээрт эргэн орохыг уриалж байна гэж тэрээр онцлоод мөн АНУ Украины хамгаалалтыг бэхжүүлэхэд туслахын тулд Зеленский болон Украины засгийн газартай "эрчимтэй харилцаж" байна гэж мэдэгджээ. Хэрэв талууд сайшааж байвал Минскийн хэлэлцээрийг хэрэгжүүлэх шинэ хүчин чармайлтыг АНУ дэмжихэд бэлэн байна гэж Нуланд мэдэгдэв.
Тэрээр хэлэхдээ, Байден Орос-Америкийн харилцаа илүү тогтвортой, урьдчилан таамаглаж болохуйц байх нь АНУ-ын ашиг сонирхолд нийцнэ гэдэгт итгэдэг хэвээр байна. Хэн НАТО-д элсэхийг эвсэл шийддэг, гадны хүчин эдгээр асуудалд хориг тавих, санал өгөх эрхгүй гэдгийг Байден Путинд ойлгуулсан гэв.
Эх сурвалж: cnn
