/2021.09.29/: "Монголын хөрөнгийн бирж" ТӨХК-ийн Гүйцэтгэх захирлын 2021 оны наймдугаар сарын 27-ны өдрийн А/70 тоот тушаалаар бүртгэсэн “Эрдэнэ Ресурс Девелопмент Корпорэйшн”-ийн 14,250,000,000 төгрөгийн үнийн дүн бүхий нэмэлт хувьцааг Санхүүгийн Зохицуулах Хорооны 2021 оны есдүгээр сарын 22-ны өдрийн А/80 тоот тогтоолоор бүртгэж олон нийтэд санал болгон арилжаалахыг зөвшөөрсөн байна.

Эрдэнэ Ресурс Девелопмент Корпорэйшн нь Монгол Улсад өндөр агуулга бүхий суурь болон үнэт металлын хайгуул, олборлолт, худалдан авалт болон төсөл хөгжүүлэлтийн үйл ажиллагаа эрхэлдэг Канад Улсад бүртгэлтэй уул уурхайн компани юм. 2018 оны зургадугаар сард Монголын хөрөнгийн биржид үнэт цаасаа давхар бүртгүүлснээр Монгол Улсын давхар бүртгэлтэй анхны компани болсон билээ.

Нэмж гаргасан хувьцааны санхүүжилтийг Баян Хөндийн Алтны төслийн ашиглалтын шатны ажлыг эхлүүлэхэд ашиглахаар төлөвлөсөн байна. Тус үнэт цаасны андеррайтерын компаниар "БиДиСЕК ҮЦК" ХК, хуулийн зөвлөхөөр өмгөөллийн "Сноу Хилл Консалтанси" ХХН, аудитын байгууллагаар "Кэй Пи Эм Жи" ХХК тус тус ажиллаж байна.

Эх сурвалж: МХБ