/2021.09.20/ Шатахууны асуудлаар Уул уурхай, хүнд үйлдвэрийн яамнаас мэдээлэл хийж байна.

Ерөнхий сайд Л.Оюун-Эрдэнэ уг нөхцөл байдалтай холбоотойгоор шатахуун импортлогчид, УУХҮЯ, АМГТГ-ынхантай Төрийн ордонд 11.00 цагаас уулзсан юм.

Өчигдрөөс хойш ШТС-ууд АИ92, АИ95 дууссан хэмээх бичиг нааж, бензин худалдаалахгүй байгаа юм. Мөн нэг жолоочид 20, 30 мянган төгрөгийн хязгаарлалт тогтоож байна гэсэн мэдээлэл цахим орчинд тархсан.

Тиймээс уг асуудлаар УУХҮ-ийн сайд Г.Ёндон, АМГТГ-ын дарга нар мэдээлэл өглөө.

УУХҮ-ийн сайд Г.Ёндон, "ОХУ-аас шатахууны 95 хувийг авдаг. Сар бүр ОХУ-аас хамгийн багадаа 28 мянган тонн АИ-92 бензин татна гэж зөвшилцсөн байдаг. Тус улсын "Ангарская" үйлдвэр жил бүрийн 8,9 дүгээр сард засвар хийдэг учир шатахуун тасалдсан. Энэ засвар дуусаад бензин татахаар төлөвлөж байсан ч өчигдөр гэнэт аравдугаар сарын 1 хүртэл шатахуун нийлүүлэх боломжгүй гэсэн" гэв.

Тиймээс БНХАУ-аас бензины сарын нөөцийг татахаар болсон. ААН-үүд мөнгөө төлөөд, гэрээгээ байгуулчихсан байгаа гэлээ.

Төлөөллүүд БНХАУ-ын элчин сайдтай уулзсан. Өнөөдрийн байдлаар 4 хоногийн шатахууны нөөцтэй байгаа. 5-7 хоногийн дотор эхний шатахууныг оруулж ирэхээр төлөвлөж байна. Тэр хүртэл шатахууныг хязгаарлана.

Түүнчлэн УУХҮ-ийн сайд Г.Ёндон, "7,8 дугаар сард шатахуун маш их борлуулагддаг. 2014 оноос ОХУ-аас гэрээгээр тогтмол шатахуун татдаг болсон. Үүнээс өмнө заавал очиж уулзаж байж бензин авдаг байсан" гэсэн юм.

Ашигт малтмал, газрын тосны газраас гаргасан шатахууны нөөцийн талаарх мэдээлийг хүргэсэн юм.