-Ачаалал эрс нэмэгдэх ч цалин нэмэгдэхгүй нь-

Монголчууд бид сүүлийн хоёр жил шахуу хөл хорионд ороод буй. Энэ хугацаанд их багагүй хүн бүр л гарзтай, алдангитай байсан юм. Үүнээс нийгэм даяараа харамсаж байгаа хэсэг бол бага ангийн сурагч хүүхдүүд. 2019 онд А үсэг сурах гээд сургуулийн босго алхаачгүй байхад нь хорио эхлээд, онлайн хичээл орж эхэлсэн . Улмаар хүүхдүүд хичээл хийж байгаа нэр дор эцэг эхээрээ хичээлээ хийлгээд дүнгээ авчихдаг болсон нь нууц биш.

- Онлайнаар хичээл орох нь хэр үр дүнтэй байна вэ?

-Цар тахлын үед багштайгаа харьцах нь танхимаар ордог байсан үеэ бодвол сул, бүрэг болсон. Онлайнаар хичээл ороход дүрс, дуугаа хаачхаад л цаанаа тоглоод байгаа болтой байдаг.

-Хүүхдүүд хичээлээ яг хийж байна уу? Цалгардах тал ажиглагдсан уу?

-Эцэг эхчүүд нь хүүхдэдээ анхаардаг бол онлайнаар ороход ч цалгардах зүйлгүй байгаа. Сурах үйл нь зөвхөн багшаас шалтгаалахгүй эцэг эх, сурагч ч мөн хамааралтай байдаг тул хүүхдийнхээ хичээлд нь санаа тавьдаг эцэг эхчүүд бол хичээлийн цагаар анхаарлыг нь төвлөрүүлж хамт сурдаг.

- Танай анги нийт хэдэн хүүхэдтэй вэ?

-41 хүүхэдтэй. Гэртээ том хүнгүй, датагаар орохоо мэдэхгүй хүүхэд ч бий. Зарим эцэг эхчүүд бүр худлаа яриад зуслан дээрээ байна аа гэж хэлээд л салгачих тохиолдол ч гарсан.

-Жирийн үед суралцаж гуравдугаар ангиа төгссөн хүүхэд ямар ур чадварыг эзэмшсэн байх ёстой вэ. Танай ангийн хүүхдүүд ур чадвараа эзэмшиж чадсан уу?

-Шалгаж үзээгүй болохоор мэдэхгүй байна. Цахим хичээл ороход хүүхдүүд боломжийн байсан. Асуусан асуултад хариулаад харилцан ярьж байгаа сурагчид байхад хоол унд эргүүлээд яваад өгөх хүүхдүүд ч байсан. Бүгдийг нь танхимаар шалгаж үзээгүй болохоор яг практикаар мэдэхгүй байна. Одоо танхимаар ороод л жинхэнэ энэ асуултыг хариуг олно доо.

-Хичээлийн жилийн эцэст дүн гарахад хэр бодитой дүн гарсан бэ?

-Яам ч биднийг дүнг нь уян хатан гаргах чиглэл өгсөн. Бид ч үүнтэй санал нэгдэж хичээлд идэвхтэй оролцсон хүүхдүүд, хамтран ажилласан эцэг эхчүүдэд “УРМЫН” дүн өгсөн. Танхимаар хичээллэдэг үед үнэлдэг байсан үнэлгээнээс тэс өөр гарсан байгаа.

-Танай ангийн нийт 41 хүүхдээс хичээлийн агуулгаа бүрэн судлаагүй, хоцрогдолтой байгаа хэдэн хүүхэд байна вэ?

- Нийт хүүхдүүд дээрээ авч үзвэл их л хэцүү дээ.

-Онлайнаар хичээллэх тал дээр таны байр суурийг сонсъё. Цаашид онлайнаар орвол ямар арга хэмжээ авах вэ?

-Цаашдаа танхимаараа орсон нь илүү өгөөжтэй. Танхимд амьд харьцаа өрнөдөг нь хүүхдүүдийг хамтаараа сурч, хөгжихөд түлхэц болдог. Нэгнийхээ ойлгоогүй зүйлсэд туслаж байгаа нь хүртэл дэмтэй байдаг.

-Цаашдаа ахин хөл хорио тогтоовол хүүхдүүдийн боловсролд хэр сөрөг нөлөөтэй байх вэ?

-Суурь мэдлэг муутай хүүхдүүд л торних байх. Гурван жилийн хичээлийн агуулгаа бүрэн эзэмшээгүй шахуу байна. Суурь мэдлэг муутай хүүхэд цаашид хөгжих гэж хэцүү шүү дээ.

-Энэ жилийн хичээлийн агуулгад өмнөх жилийн сургалтын хөтөлбөрөө шингээх үү?

-Одоогоор бидэнд тийм чиглэл өгөөгүй. Аравдугаар сарын нэгэн хүртэл түр хөтөлбөрөөр хичээллэнэ гэсэн.

-Ачаалал хэр нэмэгдэх бол 5/9 зарчмаар хичээллэхэд?

-Таван өдөр танхимаар таван өдөр цахимаар хичээллэнэ гэж байгаа юм. Миний хувьд өглөө нь тал хүүхдэдээ цахимаар хичээлээ илтгэл бэлтгэж ороод өдөр нь 13:30 цагаас сургууль дээрээ ирж үлдсэн хүүхдэдээ танхимаар хичээлээ заана гэж байгаа юм. Энэ нь багшийн ачааллыг эрс нэмнэ. Цалин дагаад нэмэгдэхгүй гэж байгаа юм тэгээд. Энэ тогтолцоо нь хэцүүхэн л байна.

-Онлайнаар ороход багш нарт хэр ачаалалтай байсан бэ?

-Жилийнхээ хөтөлбөрийн дагуу өдөр бүр ппт бэлдэж, үүнийгээ тайлбарлаад гэрийн даалгаврыг нь өдөр бүр шалгаж сүүлдээ ээдрээд ярьж ч чадахгүй, байнга дэлгэц ширтсээр байгаад нүд хүртэл өвддөг болсон.