/2023.01.24/: 125 сая хүн амтай Япон улсад өнгөрсөн онд 800 мянга хүрэхгүй хүүхэд төрсөн гэсэн тооцоо бий.
1970-аад онд энэ тоо хоёр сая гаруй байжээ. Дэлхийн олон оронд төрөлт удааширч байна.
Сүүлийн хэдэн арван жилд дундаж наслалт нэмэгдэж, өндөр настнуудын тоо нэмэгдэж байгаа ч тэдэнд туслах ажилчдын тоо буурч байгаа тул Японд энэ асуудал онцгой хурцаар тавигдаж байна.
Дэлхийн банкны мэдээллээр Япон улс одоо 65 ба түүнээс дээш насны хүн ам нийт хүн амын 28 орчим хувийг эзэлж байгаа бөгөөд наслалтаараа дэлхийд хоёрдугаарт орж байна. /Монако улс нэгт ордог/
Японы Ерөнхий сайд ноён Кишида Засгийн газраас хүүхэдтэй холбоотой хөтөлбөрүүдэд зарцуулах зардлаа хоёр дахин нэмэгдүүлэхийг хүсч байгаагаа хэлэв. Мөн дөрөвдүгээр сард энэ асуудалд анхаарлаа хандуулах төрийн шинэ агентлаг байгуулагдах талаар хэллээ.
Гэсэн хэдий ч Японы засгийн газар өмнө нь үүнтэй ижил төстэй стратегийг баримталж үзсэн ч төдийлөн амжилтанд хүрээгүй юм.
2020 онд судлаачид Японы хүн ам 2017 онд дээд цэгтээ хүрч 128 сая болсон бол энэ зууны эцэс гэхэд 53 сая хүрэхгүй болж буурна гэж таамаглаж байна. Албан ёсны мэдээллээр одоогоор хүн ам 125 сая хүрэхгүй байгаа аж.
Зарим шинжээчид насжилтын тогтолцоог өөрчлөхийн тулд одоо баримталж байгаа цагаачлалын хатуу хуулиудыг зөөлрүүлэх шаардлагатай гэж үзэж байна.
Төрөлтийн түвшин буурч байгаа нь амьжиргааны өртөг нэмэгдэж, эмэгтэйчүүдийн боловсрол, ажил хөдөлмөр, жирэмслэлтээс хамгаалах хэрэгслийн хүртээмж нэмэгдсэн зэрэг олон хүчин зүйлээс шалтгаалж, цөөн хүүхэд төрүүлэхийг сонгож байгаагаас шалтгаалж байна гэж үзэж байна.
Японы хүн амын ердөө 3 орчим хувь нь гадаадын иргэд байдаг бол Их Британид 15 хувь нь байдаг.
Эх сурвалж: ВВС
