/2021.12.06/: Мьянмарын худалдааны нийслэл Янгон хотод цэргийн машин жагсагчид руу дайрсны улмаас хэд хэдэн хүн шархаджээ.
Цэргүүд зугтсан жагсагчдын зарим руу гал нээж, заримыг нь зодсон гэж гэрчүүд орон нутгийн хэвлэлд ярьжээ.
Хоёрдугаар сард болсон төрийн эргэлтээс хойш эсэргүүцлийн жагсаалын үеэр 1200 гаруй хүн амиа алдаж, олон мянган хүн шоронд хоригдсон байна.
Сүүлийн жагсаалын үеэр 11 хүнийг баривчилсан гэж цэргийнхэн мэдэгдэв. Гурван хүн шархадсан ба нэг хүний биеийн байдал хүнд байгаа гэнэ.
Цэргийнхэн ачааны машин бүлэглэл рүү нэвтэрсэн эсэхийг батлаагүй ч "үймээн самуун дэгдээсэн" цуглааныг тараасан гэж мэдэгджээ.
Орон нутгийн мэдээллийн MPA агентлагийн мэдээлснээр баривчлагдсан хүмүүсийн дунд тэдний хоёр сэтгүүлч байсан гэж үзэж байна. Тэдний нэг нь шархадсан бололтой, нөгөөтэй нь холбоо тасарсан гэж тус агентлаг мэдээлэв.
Хунтыг эсэргүүцсэн жагсаал ням гарагт Янгон хотод болсон гурван жагсаалын нэг юм. Өмнө нь цэргийн хүчнийхэн жагсагчид руу байнга гал нээдэг байсан тул хохирогчдыг багасгахын тулд жагсаал цуглааныг зохион байгуулалттай жижиг бүлгүүд болгон зохион байгуулагдсан байна.
Гэрчүүдийн мэдээлснээр энэ удаагийн "флэш моб" жагсаал эхэлснээс хэдхэн минутын дараа өрнөсөн байна.
"Нэг цэрэг буугаараа намайг зодсон ч би түүнээс өөрийгөө хамгаалж, түүнийг хойш нь түлхсэн. Тэгээд би зигзаг хэлбэрээр зугтаж байтал тэр шууд над руу буудсан. Азаар би мултарч чадсан" гэж нэг эсэргүүцэгч Ройтерс агентлагт ярьжээ.
НҮБ-аас Мьянмар дахь цэргийн ажиллагаа нь хүн төрөлхтний эсрэг гэмт хэрэг байж болзошгүй гэж мэдэгдсэн ч тус байгууллагын элч нарыг Мьянмарт мөрдөн байцаалтын ажил явуулахыг удаа дараа хориглож байжээ.
Өнгөрсөн оны сонгуулийн үеэр Мьянмарын тухайн үеийн удирдагч Аун Сан Су Чигийн нам үнэмлэхүй ялалт байгуулсан ба бүх нийтийн сонгуулиар сонгогчдыг луйвардсан гэж хунта өнгөрсөн хоёрдугаар сард болсон төрийн эргэлтээ зөвтгөжээ.
Бие даасан сонгуулийн ажиглагчид санал хураалт үндсэндээ чөлөөтэй, шударга болсон гэж үзэж байгаа бөгөөд хатагтай Су Чид эрүүгийн хэрэг үүсгэсэн нь улс төрийн зорилготой гэж олон нийт шүүмжилдэг.
Энэ оны эхээр иргэний үл захирагдалтын тайван хөдөлгөөнийг удирдаж байсан олон идэвхтнүүд нуугдаж, эсвэл хилийн бүс нутгуудад байрлаж буй үндэстний босогчдын цэргийн сургалтанд хамрагдахаар очсон байна.
Тус улсын хот тосгод дахь зэвсэгт сайн дурын ардын хамгаалалтын хүчнүүд цэргийн засгийн газартай хамтран ажилладаг албан тушаалтнуудын эсрэг олон зуун дэлбэрэлт, аллага үйлджээ.
Зэвсэгт эсэргүүцэл хамгийн хүчтэй өрнөж байсан бүс нутгуудын байшинг шатааж, хэдэн арван мянган хүнийг ой мод болон Энэтхэгийн хил рүү хөөн зайлуулах хариу арга хэмжээг цэргийнхэн авсан байна.
Эх сурвалж: bbc
