/2023.10.03/: Европын сансрын агентлагийн (ESA) эрдэмтэд НАСА-гийн Жеймс Уэбб дуран авайг ашиглан гайхалтай нээлт хийжээ.
Тэдгээр эрдэмтэд манай нарны аймгийн хамгийн том гараг болох Бархасбадьтай тэнцэх хэмжээний чөлөөт хөвөгч биетүүд хамгийн ойрын од үүсэх бүс болох Орион мананцарт байгааг илрүүлсэн байна.
Энэхүү нээлт нь од, гараг хэрхэн үүсдэг талаарх бидний ойлголтыг илүү өндөр түвшинд хүргэсэн юм. Үүнээс өмнө эрдэмтэд хий, тоос бүхий асар том үүл дотор байх од төрдөг мананцарууд нь гаригийн хэмжээтэй биетүүдийг үүсгэх чадваргүй гэж үздэг байсан ч шинэ олдворууд өөрөөр харуулж байна.
Объектууд нэг бүрчлэн биш, хос хосоороо үүсдэг нь бүр ч гайхмаар зүйл аж.
Судалгаанд ажиллаж байсан ESA-ийн эрдэмтэн Сэмюэл Пирсон "Нью-Йорк Таймс" сонинд "Гараг үүсэх, од үүсэх талаарх бид буруу ойлголттой байжээ" гэж хэлсэн байна.
New space images!🤩
— ESA (@esa) October 2, 2023
The NASA/ESA/CSA James #Webb Space Telescope has added detailed images of the Orion Nebula to our ESASky application.
Zoom into this region with a rich diversity of phenomena including protostars, brown dwarfs and even free-floating planets! pic.twitter.com/In4FQk8hrX
Шинэ биетүүдийг Бархасбадийн массын хоёртын объект буюу JuMBO гэж нэрлэсэн байна. Тэд од болоход хангалттай том биш. Мөн одыг тойрон эргэдэггүй учраас JuMBO нь техникийн хувьд гариг биш юм.
ESA-ийн шинжлэх ухаан, хайгуул хариуцсан ахлах зөвлөх, профессор Марк Маккафрины хамтран бичсэн судалгааны өгүүллийн дагуу JuMBO-ууд сая орчим жилийн настай бөгөөд энэ нь орчлон ертөнцтэй харьцуулахад харьцангуй залуу байгаа юм. Тэдний гадаргуугийн температур ойролцоогоор 1000 хэм байдаг аж.
Гэвч тойрог замд эргэлдэж буй оддоос хүлээн авсан энергийн ачаар тогтвортой температурыг хадгалах чадвартай гаригуудаас ялгаатай нь JuMBO-ууд эцэст нь хурдан хөрч, хөлддөг байна. Тэд мөн ихэвчлэн хийнээс бүрддэг тул амьдралыг тэтгэх боломжгүй гэсэн үг юм.
Эх сурвалж: Aljazeera
