/2022.11.07/ 2008 оны долоодугаар сарын 1-нд хохирсон хүмүүсийн ар гэрийн төлөөллүүд мэдээлэл хийж байна.

-Иргэн Б.Төрсүлд:

-2008 онд МАХН-ын дарга, Монгол Улсын Ерөнхий сайд С.Баяр, ХЗДХ-ын сайд Ц.Мөнх-Оргил, Монгол Улсын Ерөнхийлөгч байсан Н.Энхбаяр тэргүүтэй нөхөд эрх барьж байсан. Долоодугаар сарын 1-ний өдрийн үймээнээр 800 гаруй иргэн баривчлагдсан байдаг. Үүний 200 гаруйг шүүхээр гэм буруутайд тооцож, шийтгэл оногдуулсан. Мөн тухайн үед үүргээ гүйцэтгэж байсан цагдаагийн байгууллагын удирдлагууд болох 5 хурандаад шүүхээс гэм буруутай гэж үзэж, ял эдлүүлэхээр болсон байдаг.

Яг үнэндээ долоодугаар сарын 1-ний өдрийн үйл ажиллагаанд тухайн үед эрх барьж байсан хүмүүс болон үймээнийг турхирсан нөхдөд шийтгэл оногдуулах ёстой байсан. Эдгээр хүмүүст өнөөдрийг хүртэл шийтгэл оногдуулаагүй. Мөн хохирсон иргэдийг цагаатгах ажил хийгдээгүй байна. Хэрэг хуучирдаггүй учир энэ хэргийг сэргээн шалгаж, хариуцлага хүлээлгэх ёстой хүмүүст хариуцлага тооцох цаг ирсэн байна. Тиймээс үүнтэй холбоотой шаардлага, албан бичгүүдийг холбогдох байгууллагуудад хүргүүлж байна гэлээ.