/2022.10.03/: Аврагчид Иан хар салхины сүйрлээс амьд үлдсэн байж болзошгүй иргэдийг эрэн хайж байна.

Орон гэргүй болсон Флоридачууд амьдралаа дахин эхлүүлэхээр тэмцэж эхэлжээ.

Санибел болон Нарс арлын ойролцоох аврах ажиллагаанд анхны тусламж үзүүлж байсан яаралтай тусламжийн эмч доктор Бен Або "Пин арал дээрх зарим залуус бүх зүйлээ алдсан, гэхдээ тэд чадах бүхнээ хийж байна. Тэд хичнээн шаргуу ажиллаж байгааг харахаар өөрийн эрхгүй нулимс урсдаг" гэв.

Гэвч Иан хар салхи Санибел арлаас эх газрын Флорида руу чиглэсэн ганц замыг хаасан тул "бид нисдэг тэргээр хайлт хийж байна" гэж Або хэлэв.

Өнгөрсөн долоо хоногт Иан хар салхи Флорида мужийг дайран өнгөрсний дараа баруун өмнөд болон төв хэсэгт усанд автсан хэсгээс 1100 гаруй хүнийг аварсан гэж мужийн захирагч Рон ДеСантисийн албанаас мэдэгдэв. Зөвхөн Ли мужид л гэхэд 800 гаруй хүнийг аварсан гэж шериф Кармин Марсено ням гарагт мэдэгдсэн юм.

Амьд үлдсэн хүмүүсийг эрэн хайх ажиллагаа үргэлжилж байгаа тул аврагчид цогцсууд олсоор байгаа аж. Албаны хүмүүсийн мэдээлснээр, Иан хар салхины улмаас Флорида мужид 76 хүн, Хойд Каролинад дөрвөн хүн амиа алджээ.

Ням гарагийн орой Флорида дахь 689,000 гаруй байшин, ААН болон бусад хэрэглэгчид цахилгаангүй хэвээр байна гэж PowerOutage.us мэдээллээ. Флоридагийн Эрүүл мэндийн газрын мэдээллээс үзэхэд ихэнх нь цэвэр усгүй байна.

Эх сурвалж: CNN