Найз бүсгүйнх нь утасны дугаарыг авахыг хүссэн хүргэлтийн жолоочийг буудсан хэрэгт 33 настай эрэгтэй Хүслэн Саруултуяаг буруутгажээ

АНУ-ын Флорида мужийн Майами-Дэйд тойрогт "Uber Eats"-ийн хүргэлтийн жолоочийг буудаж, гар буугаар толгой руу нь цохисон хэрэгт 33 настай Хүслэн Саруултуяаг шалгаж эхэлжээ. Тэрбээр хүргэлтийн жолооч найз бүсгүйнх нь утасны дугаарыг авахыг хүссэн гэх шалтгаанаар түүн рүү буу тулган, газар хэвтүүлсний дараа буудсан гэж мөрдөгчид мэдээлсэн байна.

Хүслэн Саруултуяаг хүн амины хэрэг үйлдэхийг завдсан, мөн аюултай зэвсэг ашиглан хүндрүүлэх нөхцөлтэй халдлага үйлдсэн хэрэгт буруутгажээ. Энэ талаар Law & Crime болон Майамигийн орон нутгийн WSVN 7News мэдээлсэн байна.

Шөнийн хүргэлтийн үеэр эмэгтэйтэй танилцжээ

Цагдаагийн баривчилгааны тайланд дурдсанаар, 2026 оны аравдугаар сарын 12-ны шөнийн 02:35 цагийн орчимд "Uber Eats"-ийн жолооч Майами хотын North Kendall Drive замын дагуу байрлах Pearl Dadeland Apartments орон сууцны хотхонд хоол хүргэсэн байна.

Тэрбээр байрны гол хаалганы орчимд хоол хүлээн авсан эмэгтэйтэй уулзаж, хэсэг хугацаанд ярилцсан бөгөөд Жолооч мөрдөгчдөд өгсөн мэдүүлэгтээ тухайн эмэгтэйд сэтгэл татагдсан тухайгаа хэлжээ.

Жолооч ажлаа үргэлжлүүлэн хийснийхээ дараа, ойролцоогоор 50 минутын дараа буюу 03:25 цагийн үед уг орон сууцны хотхонд буцаж ирсэн байна. Тэрбээр эмэгтэйтэй дахин уулзаж, утасны дугаарыг нь авахыг хүссэн боловч олж чадаагүй аж.

Жолоочийг буу тулган газар хэвтүүлж, буудсан гэх хэрэг

Мэдүүлэгт дурдсанаар, жолооч автомашин руугаа буцаж явах үед саарал өнгийн Chevrolet Corvette автомашинтай Хүслэн Саруултуяа иржээ. Тэрбээр машинаасаа бууж, гар буу чиглүүлэн жолоочийг газар хэвтэхийг шаардсан байна.

Жолооч тушаалыг биелүүлж газар хэвтсэн ч Саруултуяа нэг удаа буудсан гэх бөгөөд сум жолоочийн баруун өгзөг хэсгийг шүргэн шархдуулжээ. Улмаар гар бууныхаа бөгсөөр толгойн ар хэсэгт нь цохисны улмаас ойролцоогоор таван сантиметр урт нээлттэй шарх үүссэн гэж цагдаагийн тайланд тэмдэглэсэн байна.

Үүний дараа Саруултуяа жолоочийг босохыг шаардан, буугаа толгой руу нь чиглүүлж, “Би чамайг ална” хэмээн заналхийлсэн гэж мөрдөгчид мэдээлжээ.

Жолооч эцэст нь зугтаж чадсан бөгөөд өөрийн автомашинаар South Miami Hospital эмнэлэгт хүрч, эмнэлгийн тусламж авсан байна.

Автомашины улсын дугаараар сэжигтнийг тогтоосон

Мөрдөгчид гэрчийн өгсөн мэдээлэлд үндэслэн автомашины улсын дугаарыг шалгахад 2021 оны үйлдвэрлэлтэй, саарал өнгийн Chevrolet Corvette болох нь тогтоогджээ. Уг автомашин Хүслэн Саруултуяагийн нэр дээр бүртгэлтэй байсныг цагдаагийн тайланд дурдсан байна.

Саруултуяаг тухайн өдрийн орой гэрээс нь баривчилж, Майами-Дэйд тойргийн Turner Guilford Knight Correctional Center хорих байгууллагад хүргэжээ. Аравдугаар сарын 14-ний байдлаар тэрбээр цагдан хоригдож байсан тухай хэвлэлүүд мэдээлсэн байна.

Гэрт нь нэгжлэг хийхэд мансууруулах бодис болон бэлэн мөнгө илэрчээ

Саруултуяаг баривчилсны дараа түүний орон сууцанд нэгжлэг хийхэд кокаин, MDMA буюу экстази, кетамин, каннабис, псилоцибин агуулсан мөөг болон олон тооны жороор олгодог эм илэрсэн гэж WSVN мэдээлжээ.

Мөрдөгчид мөн мансууруулах бодисыг холих, хэмжээгээр нь хуваах, шошголох, савлахад ашиглаж байсан байж болзошгүй өрөө илрүүлсэн байна. Түүнчлэн 11,394 ам.доллар буюу 11 мянга гаруй ам.долларын бэлэн мөнгө хураан авсан бөгөөд уг мөнгийг мансууруулах бодисын худалдаатай холбоотой байж болзошгүй гэж үзэж байгаа аж.