/2022.02.18/: Бразилийн уулын Петрополис хотод лхагва гарагт орсон аадар борооны улмаас хөрсний гулгалт үүсч, гудамж талбайг угааж, машинуудыг урсгаж 94 хүн нас барсан гэж орон нутгийн албаныхан мэдэгдэв.
Риогийн Иргэний хамгаалалтын албаны мэдээлснээр зөвхөн мягмар гарагийн үдээс хойш орсон бороо хоёрдугаар сарын түүхэн дунджаас давсан байна.
Үерийн ус уулын энгэрийн хорооллуудаар урсчээ. Бразилийн Иргэний хамгаалалтын хэрэг эрхлэх газар мягмар гарагт 269 хөрсний гулгалт бүртгэгдсэн гэж CNN-ийн салбар CNN Brasil мэдээлэв.
Лхагва гарагт эрэн хайх, аврах багийнхан шавар дундуур явж, шалбаагнаас амьд үлдсэн хүмүүсийг хайж байна. Үндэсний иргэний хамгаалалтын газраас 24 хүнийг аварсан ч 439 гаруй хүн орон гэргүй болсон ба аврах ажиллагаа үргэлжилж байна гэж мэдэгдэв.
Рио-де-Жанейро мужийн захирагч Клаудио Кастро "Аврах ажил үргэлжилж байгаа бөгөөд бид хүний амь насыг аврах боломжтойгоос боломжгүйг хүртэл бүх зүйлийг хийх болно" гэж лхагва гарагт Twitter хуудсандаа хуваалцсан байна.
19-р зуунд Бразилийн хаант засаглалын дунд нэр хүндтэй байснаараа "Эзэн хааны хот" хэмээн хочлуулдаг Петрополис нь нийслэл Рио-де-Жанерогийн хойд толгод дээр байрладаг бөгөөд ордны архитектур, томоохон театрууд, музейнүүдээрээ алдартай. Лхагва гарагт гэрэл зураг, дүрс бичлэгээр сүрлэг хот балгас болсон байхыг харуулжээ.
Москвад ОХУ-ын Ерөнхийлөгч Владимир Путинтэй уулзаж байсан Бразилийн Ерөнхийлөгч Жаир Болсонаро лхагва гарагт сайд нартай ярилцаж, хохирогчдод яаралтай тусламж үзүүлэхийг хүссэн гэж мэдэгдэв.
Бразилд сүүлийн саруудад хэд хэдэн байгалийн гамшиг тохиолдсон.
Хоёрдугаар сарын эхээр Бразилийн санхүүгийн төв байрладаг Сан Пауло хотод хүчтэй аадар бороо орсны улмаас Бразилийн зүүн өмнөд хэсэгт үер болж, хөрсний гулгалт үүссэний улмаас 24 хүн нас барсан ажээ.
1546 гаруй гэр бүлийг нүүлгэн шилжүүлсэн тухай Улсын Иргэний хамгаалалтын албанаас гаргасан мэдэгдэлд дурьдсан бөгөөд гамшгийн улмаас найман хүүхэд нас баржээ.
Арванхоёрдугаар сарын сүүлчээр Бразилийн Бахиа мужийг арваннэгдүгээр сараас хойш сүйрүүлсэн үер, аадар борооны улмаас амиа алдагсдын тоо 20-д хүрснийг зарлав.
Үерийн улмаас хоёр далан нурж, 62,800 орчим хүнийг нүүлгэн шилжүүлсэн гэж мужийн албаны хүмүүс мэдэгдэв.
Эх сурвалж: CNN
